आयआयबीएफ परीक्षेमुळे मुंबई विद्यापीठाच्या LLM प्रवेश पूर्व परीक्षेच्या वेळापत्रकात बदल 

एज्युवार्ता न्यूज नेटवर्क 

मुंबई विद्यापीठातर्फे (Mumbai University) घेण्यात येणारी पदव्युत्तर विधी अभ्यासक्रमाची एलएलएम प्रवेश पूर्व परीक्षा (LLM Pre-Entrance Examination) १० नोव्हेंबर रोजी आयोजित करण्यात आली होती. मात्र, ७ ते १४ नोव्हेंबर रोजी संपूर्ण भारतात आयआयबीएफ च्या परीक्षा असल्याने विद्यापीठाकडून LLM प्रवेश पूर्व परीक्षेच्या वेळापत्रकामध्ये बदल (Change in schedule) करण्यात आला आहे. सुधारित वेळापत्रकानुसार आता ही परीक्षा ऑनलाइन सेंटर बेस्ड टेस्ट (सीबीटी) पद्धतीने १७ नोव्हेंबर रोजी घेण्यात येणार आहे. 

आयआयबीएफ’ च्या परीक्षा पूर्व नियोजित आहे. काही उमेदवार दोन्ही परीक्षा देण्यास इच्छुक असल्यास त्यांच्या संभाव्य अडचणी लक्षात घेऊन एलएलएम प्रवेश पूर्व परीक्षा पुढे ढकलण्याचा निर्णय घेण्यात आला आहे. मुंबई विद्यापीठाच्या एलएलएम प्रवेश पूर्व परीक्षेमुळे विधी क्षेत्रातील विद्यार्थ्यांसाठी उच्च शिक्षणाच्या संधी उपलब्ध होणार आहेत. या परीक्षेद्वारे गुणवत्ता आणि क्षमता असलेल्या विद्यार्थ्यांची निवड होईल, ज्यामुळे विधी क्षेत्रात भविष्य घडवण्यास मदत होईल.

LLM प्रवेश पूर्व परीक्षेचे स्वरूप 

एलएलएम प्रवेशपूर्व परीक्षा एक लेखी परीक्षा असून त्यामध्ये विधी  क्षेत्रातील विविध तत्त्वांवर आधारित प्रश्न विचारले जातात. परीक्षेत संविधान, फौजदारी कायदा, दिवाणी कायदा, आंतरराष्ट्रीय कायदे, आणि मानवाधिकार या प्रमुख घटकांचा समावेश आहे. या व्यतिरिक्त, लॉजिकल रीझनिंग आणि सामान्य ज्ञान या विषयांवर उमेदवारांची क्षमता तपासली जाते. प्रश्न बहुधा बहुपर्यायी स्वरूपाचे असतात आणि त्यासाठी विशिष्ट वेळ मर्यादा असते.

सीओ/ पीओ परीक्षा

दि. ७ ते १४ नोव्हेंबर २०२४ दरम्यान संपूर्ण भारतात आयआयबीएफच्या माध्यमातून सीओ/ पीओच्या परीक्षा नियोजित असल्याने कोणत्याही परीक्षार्थींना संभाव्य अडचण उद्भवू नये यासाठी व्यापक विद्यार्थी हित लक्षात घेता ही ऑनलाइन एलएलएम प्रवेशपूर्व परीक्षा १० नोव्हेंबर ऐवजी १७ नोव्हेंबर २०२४ रोजी घेण्यात येणार असल्याचे परीक्षा व मूल्यमापन मंडळाच्या संचालिका डॉ. पूजा रौंदळे यांनी सांगितले.