उमेदवार गोधळात! CUET UG परीक्षेची NTA ने ऐनवेळी बदलली शिफ्ट

एज्युवार्ता न्यूज नेटवर्क 

नॅशनल टेस्टींग एजन्सीवर (NTA) आधीच अनेक प्रश्न उपस्थित होत असताना आता आणखीन एक परीक्षेच्या निष्काळजीपणाचा प्रकार समोर आला आहे. त्यामुळे आज, ३० मे रोजी, होत असलेल्या CUET UG २०२६ (CUET UG 2026) परीक्षेच्या विद्यार्थ्यांना परीक्षा केंद्रावर गोंधळाचा सामना करावा लागला. सकाळच्या सत्रात होणारी परीक्षा ही खूप उशिरा सुरू झाली. सकाळच्या सत्रात परीक्षा (Morning Session Exam Delayed) दिलेल्या विद्यार्थ्यांनी सांगितले की, ते वेळेवर परीक्षा केंद्रावर पोहोचले होते. असे असूनही, त्यांना परीक्षा केंद्रांवर अनेक तास थांबावे लागले. त्या पार्श्वभूमीवर एनटीएवर दुपारच्या शिफ्टची वेळ बदलण्याची (The shift timing has changed) नामूष्की ओढावली. 

दरम्यान, एनटीएने परीक्षा वेळेच्या बदलाची एक अधिकृत सूचना जारी केली आहे. ज्यात म्हटले आहे की, तांत्रिक बिघाडामुळे परीक्षेच्या वेळेत बदल करण्यात येत आहे. त्यानुसार, जी परीक्षा आज, म्हणजेच ३० मे रोजी दुपारी ३ वाजता होणार होती, ती आता दुपारी ४ वाजता घेतली जाईल. मात्र, असे सांगितले असले तरी विद्यार्थ्यांना आधीच परीक्षा केंद्रावर येऊन आपला वेळ घालावा लागणार आहे. 

CUET UG परीक्षा आज दुपारी ३:०० वाजता होणार होती. मात्र, विविध परीक्षा केंद्रांवरील तांत्रिक अडचणींमुळे, परीक्षेच्या वेळेत बदल करण्यात आला आहे. एनटीएच्या अधिकृत सूचनेनुसार, CUET UG परीक्षा आता आज दुपारी ३:०० ऐवजी दुपारी ४:०० वाजता होईल. यामुळे अनेक विद्यार्थ्यांना मनस्ताप सहन करावा लागणार आहे. 

कोणत्याही माहितीसाठी केवळ अधिकृत वेबसाइटवरच अवलंबून राहावे, असे आवाहन एनटीएने सर्व विद्यार्थी आणि पालकांना केले आहे. एनटीएने विद्यार्थ्यांना मदतीसाठी एक हेल्पलाइन क्रमांक आणि ईमेल पत्ता देखील उपलब्ध करून दिला आहे. विद्यार्थी +91-11-40759000 या हेल्पलाइन नंबरवरून, cuet-ug@nta.ac.in या अधिकृत ईमेलवरून आणि cuet.nta.ac.in या अधिकृत वेबसाइटवरून मदत घेऊ शकतात.