मोठी बातमी! तब्बल २१ वर्षांनी शिक्षकेतर पदांच्या भरतीला वेग

एज्युवार्ता न्यूज नेटवर्क 

सरकारी नोकरीच्या शोधात असलेल्या हजारो बेरोजगार तरूणांसाठी महत्त्वाची अपडेट समोर आली आहे. शिक्षकेतर भरतीसाठी शासनाने आता पावले उचलली असून, शिक्षकेतर कर्मचाऱ्यांची भरती (Non-teaching Staff Recruitment) करण्यासाठी नव्याने पात्रता तसेच निकष जाहीर केले आहेत. त्याला महाराष्ट्र खासगी शाळांतील कर्मचारी सेवेच्या शर्ती सुधारणा नियम, २०२६ (Amendment Rules, 2026) असे संबोधण्यात येणार असून याच नियमांच्या आधारे भरती (Recruitment based on rule) केली जाणार आहे. त्यामुळे शिक्षकेतर कर्मचारी भरती प्रक्रियेला तब्बल २१ वर्षांनी वेग आल्याचे स्पष्ट झाले आहे.

राज्यातील खासगी अनुदानित माध्यमिक व उच्च माध्यमिक शाळांमध्ये २००५ नंतर शिक्षकेतर पदांची भरती झालेली नाही. त्यानंतर २०१९ चा नवीन आकृतीबंध जाहीर करून शासन शांत बसले. मात्र, आता २०२६ मध्ये पुन्हा शिक्षकेतर कर्मचारी भरती प्रक्रियेसाठी नवीन निकष आणि पात्रतेसंदर्भात महाराष्ट्र खासगी शाळांतील कर्मचारी सुधारणा नियम, २०२६ बनविण्यात आला आहे. त्यानुसारच आता भरती प्रक्रिया राबविण्यात येणार असल्याचे स्पष्ट झाले आहे. त्यामुळे आता तरी भरती प्रक्रिया राबण्यात येते का? हे पाहाणे महत्त्वाचे ठरणार आहे. 

या भरती अंतर्गत वरिष्ठ लिपिक, कनिष्ठ लिपिक, मुख्य लिपिक, ग्रंथपाल आणि प्रयोगशाळा सहायक यांसारखी पदे भरण्यात येणार आहेत. यामध्ये कनिष्ठ लिपिकांची १७ हजार ६९५ पदे, वरिष्ठ लिपिकांची ४ हजार ९१२ पदे, मुख्य लिपिकांची ९२३ पदे असतील. तर ग्रंथपालांची २ हजार ११८ पदे तर प्रयोगशाळा सहायक नववी ते दहावीची ४ हजार ६८५ पदे भरली जाण्याची शक्यता वर्तवण्यात येत आहे. सोबतच प्रयोगशाळा सहाय्यक उच्च माध्यमिक २ हजार ४० पदेही यातून निर्माण केली जाणार आहेत. 

या भरती प्रक्रियेसाठी शैक्षणिक पात्रता निश्चित करण्यात आली आहे. कनिष्ठ लिपिक पदासाठी शासानमान्य विद्यापीठाची कोणत्याही शाखेतील पदवी किंवा शासनाने समतुल्य म्हणून घोषित केलेली इतर कोणतीही अर्हता ग्राह्य धरण्यात येईल. तसेच टंकलेखन किंवा संगणक टंकलेखनातील शासनाने अधिकृत केलेल्या सक्षम प्राधिकाऱ्याने दिलेले मराठी टंकलेखनाची प्रतिमिनिट ३० शब्द किंवा इंग्रजी टंकलेखनाची प्रतिमिनिट ४० शब्द या गतीचे प्रमाणपत्र आवश्यक आहे. वरिष्ठ लिपिक पदासाठी नियमित वेतनश्रेणीवर कार्यरत असलेल्या कनिष्ठ लिपिकांमधून पदोन्नतीद्वारे नियुक्ती केली जाणार आहे. या पदासाठी किमान तीन वर्षांची सेवा पूर्ण केलेली असणे आवश्यक असून ज्येष्ठता आणि गुणवत्ता यांचा विचार करून पदोन्नती दिली जाईल.

मुख्य लिपिक पदासाठी वरिष्ठ लिपिक पदावर किमान तीन वर्षांची सेवा पूर्ण केलेल्या कर्मचाऱ्यांमधून पदोन्नती दिली जाणार आहे. ग्रंथपाल पदासाठी उमेदवाराकडे सांविधिक विद्यापीठाची ग्रंथालय विज्ञान विषयातील पदवी किंवा मान्यताप्राप्त संस्थेची ग्रंथालय विज्ञान विषयातील पदविका असणे आवश्यक आहे. त्याचबरोबर कोणत्याही शाखेतील पदवीही आवश्यक राहील. प्रयोगशाळा सहाय्यक पदासाठी उमेदवाराने मान्यताप्राप्त परीक्षा मंडळाकडून इयत्ता बारावी विज्ञान शाखेतून उत्तीर्ण असणे आवश्यक आहे. तर शिपाई किंवा सेवक पदासाठी किमान बारावी उत्तीर्ण असणे ही पात्रता निश्चित करण्यात आली आहे.