धक्कादायक: शिक्षकाच्या जागेवर स्वच्छता कामगाराची नियुक्ती; नगर परिषदेचा अफलातून आदेश 

एज्युवार्ता न्यूज नेटवर्क 

राज्याच्या विधिमंडळात गेल्या काही दिवसांपासून शिक्षण विभागाच्या कार्यभाराचे वाभाडे काढले जात असताना आता वर्धा जिल्ह्यातील (Wardha district)पुलगाव नगरपरिषदेचा (Pulgaon Municipal Council) एक अजब व धक्कादायक प्रकार समोर आला आहे. शाळेच्या शिक्षकांच्या जागेवर सफाई कर्मचाऱ्यांची बदली (Transfer of sanitation workers to replace teachers)करून त्यांच्याकडे विद्यार्थ्यांना शिकवण्याचे काम सोपविण्यात आले आहे. त्यावर महाराष्ट्र राज्य प्राथमिक शिक्षक समितीने (Maharashtra State Primary Teachers Committee)आक्षेप घेतला असून पुलगाव नगरपरिषदेने हा आदेश रद्द करावा, अशी मागणी केली आहे.

पुलगाव नगरसेवक परिषदेच्या प्राथमिक शाळेच्या पटसंख्यानुसार शाळेत शिक्षक कमी पडत असल्यामुळे विद्यार्थ्यांचे शैक्षणिक नुकसान होऊ नये, याकरिता शाळेतील शिक्षणासेवक व स्वच्छता कृत विभागातील सफाई कामगार यांचे स्थानांतर करण्याचे आदेश पुलगाव नगरपरिषदेचे मुख्य अधिकारी विजयकुमार आश्रमा यांच्याकडून काढण्यात आले. त्यात स्वच्छता विभागातील सफाई कामगार चेतन रमेश चंडेला यांची शहीद भगतसिंग प्राथमिक शाळा क्रमांक 4 येथे अतिरिक्त स्वरूपात शाळेत विद्यार्थ्यांना शिकवण्याकरिता बदली करण्यात आली. या बदली आदेशामध्ये संबंधित कर्मचाऱ्याला कोणताही आर्थिक मोबदला दिला जाणार नाही तसेच मूळ आस्थापनेवर कोणताही बदल होणार नाही, असे नमूद करण्यात आले आहे.

शहीद भगतसिंग प्राथमिक शाळा क्रमांक 4 येथे शंकर पंजाब जाधव हे शिक्षण सेवक म्हणून कार्यरत होते. त्यांची बदली राणी लक्ष्मीबाई नगरपरिषद प्राथमिक शाळा क्रमांक एक येथे करण्यात आली. शंकर जाधव यांच्या जागी दुसऱ्या शिक्षकाची बदली होणे अपेक्षित होते. परंतु, त्या जागेवर स्वच्छता विभागातील सफाई कामगाराची नियुक्ती करण्यात आली. त्यामुळे महाराष्ट्र राज्य प्राथमिक शिक्षक समितीचे राज्य अध्यक्ष विजय कोंबे यांनी वर्धा जिल्ह्याचे उपजिल्हाधिकारी सौरभ कावळे यांना निवेदन दिले आहे. मात्र, आदेश हा अफलातून असल्याचे त्यात नमूद केले आहे.

प्राथमिक शिक्षक समितीने दिलेल्या निवेदनानुसार शिक्षण हक्क कायद्यानुसार प्रत्येक शाळेत आवश्यक शैक्षणिक अर्थ असणाऱ्या शिक्षकाचीच नियुक्ती करणे आवश्यक आहे. तसेच ज्या शाळेतून नियुक्ती केली त्या ठिकाणी पर्याप्त पटसंख्या असताना देखील शिक्षकाचे स्थलांतर करण्यात आले आहे. संबंधित शिक्षकाचे स्थलांतर करण्याची आवश्यकता नव्हती. कार्यरत शिक्षण सेवकाचे स्थलांतर करून त्याच्या जागी सफाई कामगार अध्यापनासाठी नियुक्त करणे, हे अनाकलनीय व अतार्किक आहे. प्राथमिक शाळेत शिक्षकाच्या ऐवजी सफाई कामगार नियुक्त करणे हे असमर्थनीय आहे. त्यामुळे संबंधित आदेश रद्द करावा, अशी मागणी निवेदनाद्वारे करण्यात आली आहे.

------------------------------------

 शिक्षकाच्या जागी स्वच्छता कर्मचाऱ्यांची नियुक्ती करून विद्यार्थ्यांच्या शिक्षणाचा खेळ खंडोबा केला जात आहे. शिक्षकाच्या जागेवर शिक्षकाचीच नियुक्ती करणे आवश्यक असताना स्वच्छता कर्मचाऱ्याकडे शिक्षणाची जबाबदारी देऊन जिल्हा प्रशासन काय साध्य करत आहे.हे अनाकलनीय आहे. त्यामुळे संबंधित अफलातून आदेश रद्द करून शिक्षकाच्या जागी दुसऱ्या शिक्षकाची नियुक्ती करावी, या मागणीचे निवेदन संबंधित अधिकाऱ्यांना देण्यात आले आहे. 

- विजय कोंबे, राज्याध्यक्ष, महाराष्ट्र राज्य प्राथमिक शिक्षक समिती,