अंगणवाडी सेविका बेमुदत संपावर; मागण्या मान्य न झाल्यास राज्यभर आंदोलनाचा वनवा पेटणार.. 

एज्युवार्ता न्यूज नेटवर्क 

राज्यातील दोन लाख अंगणवाडी सेविकांनी आजपासून बेमुदत संपाचे (Indefinite strike of Anganwadi workers) हत्यार उपसले आहे. मागील अनेक वर्षापासून प्रलंबित असलेल्या विविध मागण्यांसाठी (Pending Demands) अंगणवाडी सेविकांनी (Anganwadi worker) थेट मुंबईचे आझाद मैदान गाठले आहे. या आंदोलनानंतरही सरकारने मागण्यांकडे दुर्लक्ष केले किंवा मागण्या मान्य न केल्यास राज्यव्यापी आंदोलनाचा वनवा पेटणार असल्याचा इशारा महाराष्ट्र राज्य अंगणवाडी कर्मचारी कृती समितीने (Maharashtra State Anganwadi Staff kruti Committee) दिला आहे. 

राज्यातील अंगणवाडी सेविका आजपासून संपावर जाणार आहेत. मुंबईतील आझाद मैदानावर अंगणवाडी सेविकांकडून बेमुदत संप पुकारण्यात आलाय. तर येत्या २१ ऑगस्टला सरकार विरोधात मोर्चा काढणार असल्याचे समोर येत आहे. या मोर्चात २ लाख अंगणवाडी सेविका सहभागी होणार आहेत. मानधनात वाढ करण्याच्या मागणीसाठी अंगणवाडी सेविका आक्रमक झाल्या असल्याचे समोर पुन्हा एकदा समोर आले आहे.

यापूर्वी अंगणवाडी सेविकांनी डिसेंबर २०२३ मध्ये राज्यव्यापी संप केला होता. मानधनात दरमहा ५ हजार रूपये वाढ होईल, असे आश्वासन संबंधित प्रशासनाकडून देण्यात आले होते. परंतु, अद्याप पगारवाढीसंदर्भात कोणताही प्रस्ताव दिलेला नाही. त्यामुळे अंगणवाडी सेविकांकडून पुन्हा एकदा संपाची हाक देण्यात आली आहे. राज्यभरातील अंगणवाडी सेविकांचा या संपाला उत्फूर्त प्रतिसाद असल्याचे दिसून येत आहे. मानधनात वाढ करण्याचा निर्णय, कायदेशीररित्या ग्रॅच्युइटी देण्यात यावी, मान्य केल्याप्रमाणे मासिक पेन्शन योजना लागू करावी, अशा मागण्यांसाठी अंगणवाडी सेविका रस्त्यावर उतरल्या आहेत.

एकात्मिक बालविकास सेवा योजनेंतर्गत राज्यातील अंगणवाडी केंद्रात ० ते ६ वयोगटातील बालके, गर्भवती  यांना पूरक पोषण आहार देणे, पूर्व शालेय शिक्षण या सेवा देणे, तसेच लसीकरण, आरोग्य तपासणी, पोषण व आरोग्य विषयक शिक्षण आदी कामे अंगणवाडी सेविकांमार्फत करण्यात येतात. या योजनेमध्ये सुमारे १ लाख १३ हजार अंगणवाडी केंद्रात २ लाख अंगणवाडी सेविका कार्यरत आहेत.