पुन्हा पूजा खेडकर पॅटर्न! बनावट दिव्यांग प्रमाणपत्र काढल्याने चौघांवर गुन्हा दाखल!

एज्युवार्ता न्यूज नेटवर्क

नगर जिल्हा रुग्णालयाचा (Nagar District Hospital) लॉगिन आयडी व पासवर्ड वापरून शासकीय पोर्टलवर खोटी माहिती अपलोड करत चार जणांनी दिव्यांगांची बनावट प्रमाणपत्र (Fake Disability Certificate) घेतल्याचे उघड झाल्याने या चौघांसह जिल्हा रुग्णालयातील अज्ञात कर्मचाऱ्यांविरुद्ध गुन्हा दाखल करण्यात आला आहे. अतिरिक्त जिल्हा शल्यचिकित्सक डाॅ. साहेबराव डवरे (Dr. Sahebrao Davare) यांच्या तक्रारीवरून सागर भानुदास केकाण, प्रसाद संजय बडे, सुदर्शन शंकर बडे व गणेश रघुनाथ पाखरे (रा. पाथर्डी  जि. अहमदनगर) यांच्यावर विविध कलमांतर्गत गुन्हा दाखल केला आहे. 

काही दिवसांपूर्वी पूजा खेडकर प्रकरण देशभरात गाजले होते. त्या प्रकरणातून बनावट प्रमाणपत्रांचा मुद्दा चर्चेत आला होता. या पार्श्वभूमीवर पुण्यातील स्टुडंटस राइट्स असोसिएशनने राज्याच्या आरोग्य विभागाकडे बनावट प्रमाणपत्राच्या आधारे नोकरी मिळवलेल्या संशयितांची यादी सादर करून फेरवैद्यकीय तपासणीची मागणी केली होती. त्याची दखल घेऊन आरोग्य विभागाने दिव्यांग आयुक्त कार्यालयास वैद्यकीय तपसाणीचे निर्देश दिले. त्यानुसार आता पुढील प्रक्रियेसाठी आरोग्य विभागाच्या सहसंचालकांनी दिव्यांग  कल्याण आयुक्तांना पत्र दिले आहे. 

त्यानुसार विविध विभागांमध्ये नियुक्ती मिळालेले बोगस ३५९ जण बृहन्मुंबई महापालिकेअंतर्गत, तर  शिक्षण विभागात नियुक्ती मिळालेले ६४ असे एकूण ४२३ दिव्यांग कर्मचाऱ्यांची नियुक्ती प्राधिकाऱ्यांमार्फत फेरतपासणी करण्यासाठी पुढील कार्यवाही करण्याबाबत नमूद करण्यात आले आहे. यातून खोट्या कागदपत्रांच्या आधारे नोकरी मिळवली आहे का, हे उघड केले जाणार आहे.

दिव्यांग प्रवर्गातून शासकीय नोकरी मिळवलेल्या उमेदवारांची फेरतपासणी आरोग्य विभागाने दिली आहे. एकूण ४२३ जणांची फेरतपासणी करण्याबाबत स्पष्ट करण्यात आले आहे. या फेरतपासणीतून बनावट प्रमाणपत्रांच्या आधारे नोकरी मिळवली आहे का, हे स्पष्ट होणार आहे.