दहावी-बारावी पुरवणी परीक्षेचा निकाल मंगळवारी

एज्युवार्ता न्यूज नेटवर्क 

SSC HSC BOARD:  महाराष्ट्र राज्य माध्यमिक व उच्च माध्यमिक शिक्षण मंडळातर्फे (State Board of Secondary and Higher Secondary Education)जून- जुलै 2025 मध्ये घेण्यात आलेल्या इयत्ता दहावी-बारावी पुरवणी परीक्षेचा निकाल (10th and 12th supplementary exam results)मंगळवारी दुपारी एक वाजता ऑनलाईन पद्धतीने जाहीर केल्या जाणार आहे. विद्यार्थ्यांना राज्य मंडळाच्या संकेतस्थळावर हा निकाल पाहता येणार आहे.

ऑनलाइन निकाल जाहीर झाल्यानंतर दुसऱ्या दिवसापासूनच दहावी-बारावीच्या पुरवणी परीक्षेत प्रविष्ट झालेल्या विद्यार्थ्यांना स्वतःच्या अनिवार्य विषयांपैकी कोणत्याही विशिष्ट विषयात त्याने संपादित केलेल्या गुणांची पडताळणी व उत्तरपत्रिकांच्या छायांकित प्रतीसाठी तसेच पुनर्वल्यांकनासाठी संबंधित विभागीय मंडळाकडे ऑनलाइन पद्धतीने अर्ज करता येणार आहे. संकेतस्थळावर याबाबतच्या अटी व शर्ती देण्यात आले आहेत. गुणपडताळणी व छायांकित प्रतीसाठी 30 जुलै ते 8 ऑगस्टपर्यंत ऑनलाईन अर्ज स्वीकारले जाणार आहेत.

जून- जुलै 2025 पुरवणी परीक्षेच्या उत्तर पत्रिकेचे पुनर्मूल्यांकन करण्यासाठी सुरुवातीला विद्यार्थ्यांना ऑनलाइन पद्धतीने मंडळाच्या अधिकृत संकेतस्थळावरून प्रथमतः उत्तरपत्रिकेची छायांकित प्रत घेणे अनिवार्य आहे. छायांकित प्रत मिळाल्याच्या पाच दिवसापासून पुढे पुर्नमूल्यांकनाच्या कार्यपद्धतीचा अवलंब करता येणार आहे. ज्या विद्यार्थ्यांना उत्तरपत्रिकेचे पुनर्वल्यांकन करायचे असेल त्यांनी अधिक माहितीसाठी विभागीय मंडळाशी संपर्क साधावा, असे राज्य मंडळातर्फे प्रसिद्धी पत्रकाद्वारे स्पष्ट करण्यात आले आहे.