आनंदाची बातमी: 36 हजार विद्यार्थ्यांचे PRN UNBLOCK; परीक्षा अर्ज भरण्यास मुदतवाढ
N+2++ अंतर्गत 25 हजार 327 विद्यार्थी पात्र ठरले आहेत. मात्र,त्यातील केवळ 1 हजार 441 विद्यार्थ्यांनी परीक्षा अर्ज भरला आहे.तर N+2+1 अंतर्गत 10 हजार 991 विद्यार्थी पात्र ठरले असून त्यातील केवळ 853 विद्यार्थ्यांनी परीक्षा अर्ज भरला आहे.
eduvarta@gmail.com 
एज्युवार्ता न्यूज नेटवर्क
सत्रपूर्ततेमुळे PRN BLOCK झालेल्या विद्यार्थ्यांसाठी आनंदाची बातमी आहे. विद्यापीठाने या विद्यार्थ्यांना परीक्षा देण्याची संधी उपलब्ध करून दिली आहे. मात्र, हजारो विद्यार्थ्यांनी अद्याप या संधीचा लाभ घेतला नसल्याचे समोर आले आहे. विद्यापीठाने 36 हजार 318 विद्यार्थ्यांचे PRN UNBLOCK केले असले तरी केवळ 2 हजार 294 विद्यार्थ्यांनी परीक्षा अर्ज भरला आहे. त्यामुळे विद्यापीठाने विद्यार्थी हिताचा निर्णय घेत परीक्षा अर्ज भरण्यासाठी मुदतवाढ दिली आहे. त्यामुळे अजूनही पात्र विद्यार्थ्यांनी येत्या 8 जून पर्यंत अर्ज भरावा, असे आवाहन करण्यात आले आहे.
विद्यापीठ अनुदान आयोगाच्या नियमावलीनुसार विद्यार्थ्यांना नियोजित कालावधीमध्ये पदवी प्राप्त करण्याचे बंधन घालण्यात आले आहे.परंतु काही कारणांमुळे यूजीसीने दिलेला सत्र पूर्ततेचा कालावधी पूर्ण झालेल्या विद्यार्थ्यांना परीक्षेची संधी उपलब्ध करून द्यावी, अशी मागणी विद्यापीठाकडे करण्यात आली होती. त्यावर विद्यापीठाच्या अधिकार मंडळामध्ये चर्चा करून तब्बल दहा वर्षांपूर्वीच्या विद्यार्थ्यांना परीक्षेची संधी उपलब्ध करून दिली . याबाबतचे पत्रक विद्यापीठाने संकेतस्थळावर प्रसिद्ध केले आहे.
विद्यापीठाने विद्यार्थ्यांना आपल्या महाविद्यालयात जाऊन परीक्षेबाबत संपर्क साधण्याच्या सूचना दिल्या आहेत. परंतु हजारो विद्यार्थ्यांना आपला ब्लॉक झालेला पी आर एन क्रमांक अनब्लॉक झाला असल्याची माहिती नसल्याचे दिसून येत आहे. विविध विद्यार्थी संघटनांकडून ब्लॉक झालेल्या विद्यार्थ्यांना परीक्षेची संधी उपलब्ध करून द्यावी, यासाठी विद्यापीठात आंदोलने करण्यात आली होती. मात्र विद्यापीठाने उपलब्ध करून दिलेल्या संधीचा विद्यार्थी लाभ घेत नसल्याचे आढळून आले आहे.
विद्यापीठाने N+2++ तसेच N+2+1 अंतर्गत विद्यार्थ्यांना परीक्षेची संधी उपलब्ध करून दिली आहे. N+2++ अंतर्गत 25 हजार 327 विद्यार्थी पात्र ठरले आहेत. मात्र,त्यातील केवळ 1 हजार 441 विद्यार्थ्यांनी परीक्षा अर्ज भरला आहे.तर N+2+1 अंतर्गत 10 हजार 991 विद्यार्थी पात्र ठरले असून त्यातील केवळ 853 विद्यार्थ्यांनी परीक्षा अर्ज भरला आहे. त्यामुळे संधी देऊनही हजारो विद्यार्थ्यांनी या संधीचा फायदा घेतला नाही. विद्यार्थ्यांनी या संधीचा लाभ घेण्यासाठी आपल्या महाविद्यालयात तात्काळ संपर्क साधावा.विद्यार्थ्यांकडून हमीपत्र लिहून घेतले जाते. PRN UNBLOCK झालेल्या विद्यार्थ्यांची माहिती महाविद्यालयात पाठवण्यात आली आहे.
-----------------
काही कारणांमुळे एका दोन विषय राहिल्याने पदवी पूर्ण करू न शकलेल्या विद्यार्थ्यांना विद्यापीठाने परीक्षेची संधी उपलब्ध करून दिली आहे. या संधीचा उपयोग करून विद्यार्थ्यांनी परीक्षा अर्ज भरावा. परीक्षा अर्ज भरण्यासाठी विद्यापीठाने 8 जून पर्यंत मुदतवाढ दिली आहे.
- डॉ. राजेंद्र तलवारे, संचालक परीक्षा व मूल्यमापन मंडळ, सावित्रीबाई फुले पुणे विद्यापीठ, पुणे
