मुकुंददास लोहिया इंजीनियरिंग कॉलेजने 'बनवाबनवी ' केल्याचा आरोप, MES संस्थेने सर्व आरोप फेटाळले
डॉ. बाबासाहेब आंबेडकर तंत्रशास्त्र विद्यापीठ (बाटू) आणि तंत्रशिक्षण संचालनालय, महाराष्ट्र राज्य (डीटीई) यांनी अलीकडेच या कॉलेजमधील सर्व सुविधांची पुन्हा पाहणी केली असून, कॉलेजमध्ये नियमानुसार विद्यार्थ्यांना उपलब्ध करून देण्यात आलेल्या सर्व शैक्षणिक सुविधांविषयी समाधान व्यक्त केले आहे,असे संस्थेने प्रसिध्दिस दिलेल्या प्रकटनात नमूद केले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र एज्युकेशन सोसायटीच्या मुकुंददास लोहिया कॉलेज ऑफ इंजीनियरिंगने केलेल्या 'बनवाबनवी ' ची कागदपत्रे सबळ पुराव्यासह 'एआयसीटीई' दिल्ली च्या कार्यालयाकडे देण्यात आली असून कॉलेजची मान्यता रद्द करावी, अशी मागणी करण्यात आली आहे. त्यावर मान्यता रद्द करण्यासाठी योग्य तो निर्णय घेण्यात येईल,असे आश्वासन अखिल भारतीय तंत्र शिक्षण परिषद नवी दिल्लीच्या कार्यलयामार्फत देण्यात आले आहे.असे युवासेनेचे सहसचिव कल्पेश यादव यांनी शुक्रवारी पत्रकार परिषदेत सांगितले.
दरम्यान, कॉलेजविषयी समाजात खोडसाळपणे अपप्रचार केला जात असून विद्यार्थी आणि पालक तसेच समाजात संभ्रम निर्माण करून शैक्षणिक कार्यात विघ्न निर्माण करण्याचा प्रयत्न होताना दिसतो आहे. विद्यार्थ्यांना उद्योजकतेच्या दिशेने घेऊन जाणारे कालानुरूप शिक्षण देण्याच्या हेतूने नव्याने सुरु करण्यात आलेल्या एमईएस मुकुंददास लोहिया कॉलेज ऑफ इंजिनीअरींगची प्रतिमा डागाळण्यासाठी होत असलेल्या प्रयत्नांचा संस्था निषेध करीत आहे,असे प्रकटन संस्थेच्या नियामक मंडळाचे अध्यक्ष बाबा शिंदे यांनी प्रसिद्ध केले आहे.
पत्रकार परिषदेत कल्पेश यादव म्हणाले, पुणे विभागीय तंत्र शिक्षण सहसंचालक दत्तात्रय जाधव यांच्याकडे मुकुंदास लोहिया कॉलेज ऑफ इंजीनियरिंगने मोडलेल्या नियमांचे सर्व पुरावे, सादर केले असून पुणे विभागीय डीटीईकडून गठित केलेल्या चौकशी समितीच्या अहवालाप्रमाणे संबंधित महाविद्यालय,संस्थेवर कोणतीही कारवाई केली जात नाही, त्यामुळे राज्याचे उच्च व तंत्र शिक्षण मंत्री चंद्रकांत पाटील यांनी या प्रकरणात लक्ष घालून विद्यार्थ्यांचे होणारे शैक्षणिक नुकसान टाळावे आणि विद्यार्थ्यांचे दुसऱ्या महाविद्यालयात समायोजन करावे, अशी विनंती करणार आहे,
महाराष्ट्र एज्युकेशन सोसायटी या नामांकित शिक्षण संस्थेने इंजिनिअरिंग कॉलेज सुरू करण्यासाठी इमारत बांधलेली नसताना कॉलेज सुरू करून एआयसीटीई, राज्य शासन, डॉ. बाबासाहेब तंत्रशास्त्र विद्यापीठ, तंत्र शिक्षण विभाग आणि सर्वात महत्वाचे विद्यार्थी व पालकांची फसवणूक केली आहे.
संस्थेच्या या 'बनवाबनवी'ची माहिती सुमारे एक महिन्यापूर्वी प्रसार माध्यमांसमोर आणली होती. तसेच संस्था माझ्याविरोधात कायदेशीर कारवाई करणार असल्याचे वेगवेगळ्या वृत्तपत्रात बातम्यांमध्ये वाचले होते. परंतु, संस्थेकडून मला कोणतीही नोटीस आलेली नाही. त्यामुळे संस्था चुकली असून नियमबाह्य पद्धतीने संस्थेने कॉलेज सुरू ठेवले असल्याचे सिद्ध होते. त्यामुळे आता कॉलेजची मान्यता रद्द करून नियमबाह्य पद्धतीने कॉलेज सुरू ठेवणाऱ्या शिक्षण संस्थांना वठणीवर आणावे, यासाठी शिक्षणमंत्री चंद्रकांत पाटील यांनी लक्ष घालणे गरजेचे आहे,असेही यादव यांनी यावेळी सांगितले.
इमारत अपूर्ण असणे, प्रयोगशाळा, ग्रंथालय, वर्कशॉप आदी सुविधा उपलब्ध नसणे, तसेच इंजिनिअरिंग कॉलेज गरवारे कॉलेजच्या कॅम्पसमध्ये असल्याचे एआयसीटीई, आणि तंत्र शिक्षण विभागाला कागदपत्री कळवणे आणि प्रत्यक्षात काहीच अस्तित्वात नसणे ही पूर्णपणे बनवाबनवी आहे.
तसेच मुकुंदनगर कोथरुडच्या आयएमसी एमबीए महाविद्यालयात इंजिनिअरिंग कॉलेजचे वर्ग चालू करून केवळ नफेखोरीसाठी विद्यार्थी ,पालक,शासनाची दिशाभूल करत विद्यार्थ्यांच्या भवितव्याशी खेळत आहे. हा प्रकार आम्ही समोर आणल्यानंतर डीटीईच्या कार्यलयामार्फत झालेल्या चौकशी समितीत ही महाविद्यालयाने बनवबनवी केली असल्याचे निदर्शनास आले आहे. म्हणजेच महाविद्यालयाच्या या बनवाबनवी मध्ये दुर्दैवाने तंत्र शिक्षण सहसंचालक सहभागी असल्याचे दिसून येत आहे, त्यामुळे केवळ कॉलेजवरच नाही तर तंत्र शिक्षण सहसंचालक दत्तात्रय जाधव यांच्यावरही कारवाई करावी, अशीही मागणी कल्पेश यादव यांनी केली.
---------------------------------------------
'एफआरए' च्या समितीकडून विद्यार्थ्यांची फसवणूक
सर्व पायाभूत सुविधा तपासूनच एफआरए कडून शुल्क निश्चितीसाठी मान्यता दिली जाते. मात्र, मुकुंददास लोहिया कॉलेजकडे कोणत्याही सुविधा अस्तित्वात नसताना या कॉलेजला लाखो रुपये फी निश्चित करण्यास परवानगी दिली. त्यामुळे येथे एफआयए ची समिती सुध्दा या बनवाबनवीमध्ये सहभागी असल्याचे स्पष्ट होते. त्यामुळे संबंधित समिती सदस्यांवर कारवाई करण्यात यावी, अशीही मंत्री चंद्रकांत पाटील यांच्याकडे विनंती आहे.
--------------------------------------------
संस्थेच्या नियामक मंडळाचे अध्यक्ष बाबा शिंदे यांनी प्रसिद्ध केलेल्या प्रकाटनानुसार महाराष्ट्र एज्युकेशन सोसायटीच्या मुकुंददास लोहिया कॉलेज ऑफ इंजिनीअरींगने अखिल भारतीय तंत्रशिक्षण परिषद (एआयसीटीई) च्या सर्व निकषांची पूर्तता केली आहे. डॉ. बाबासाहेब आंबेडकर तंत्रशास्त्र विद्यापीठ (बाटू) आणि तंत्रशिक्षण संचालनालय, महाराष्ट्र राज्य (डीटीई) यांनी अलीकडेच या कॉलेजमधील सर्व सुविधांची पुन्हा पाहणी केली असून, कॉलेजमध्ये नियमानुसार विद्यार्थ्यांना उपलब्ध करून देण्यात आलेल्या सर्व शैक्षणिक सुविधांविषयी समाधान व्यक्त केले आहे. कॉलेजमध्ये देण्यात येणाऱ्या शिक्षणाविषयी कॉलेजमध्ये शिक्षण घेत असलेले विद्यार्थी आणि त्यांचे पालक समाधानी असून यासंदर्भात त्यांची कोणतीही नाराजी नाही. १६५ वर्षांची शैक्षणिक परंपरा असलेली महाराष्ट्र एज्युकेशन सोसायटी कायमच विद्यार्थ्यांना केंद्रस्थानी ठेवून कार्यरत राहिली आहे आणि भविष्यात देखील याच विचाराने संस्थेची वाटचाल होत राहील.
