SPPU: वादात सापडलेल्या कन्व्हेन्शन सेंटरबाबत उपमुख्यमंत्री अजित पवार लक्ष घालणार?

एज्युवार्ता न्यूज नेटवर्क

सिरम इन्स्टिट्यूटच्या (Serum Institute) माध्यमातून सावित्रीबाई फुले पुणे विद्यापीठाला कन्व्हेन्शन सेंटर (Convention Center) `दिले जाणार होते. परंतु,याबाबत वाद निर्माण झाल्याने आणि या प्रकल्पात अधिक स्पष्टता येत नसल्याने सिरम इन्स्टिट्यूटने कन्व्हेन्शन सेंटर उभारण्यासाठी उचलेले पाऊल मागे घेतले.मात्र,त्यावर आता राज्याचे उपमुख्यमंत्री अजित पवार यांनी हस्तक्षेप (Deputy Chief Minister Ajit Pawar) करण्यास तयारी दाखवली आहे.परिणामी विद्यापीठात कन्व्हेन्शन सेंटर उभे राहू शकते,अशी आशा निर्माण झाली आहे.

राज्याचे उपमुख्यमंत्री अजित पवार यांनी गुरूवारी सकाळी 7 वाजता विद्यापीठाला भेट दिली.विद्यापीठातील विकास कामांचा आढावा घेतला.याप्रसंगी सावित्रीबाई फुले पुणे विद्यापीठाचे कुलगुरू डॉ. सुरेश गोसावी, प्र - कुलगुरू डॉ पराग काळकर, प्रभारी कुलसचिव प्रा.डॉ.ज्योती भाकरे, वित्त व लेखाधिकारी डॉ. चारुशीला गायके, आयआयएलचे संचालक डॉ.देविदास गोल्हार, व्यवस्थापन परिषद सदस्य रविंद्र शिंगणापूरकर, प्राचार्य डॉ. देविदास वायदंडे, प्राचार्य डॉ.नितीन घोरपडे, डॉ.ज्योत्स्ना एकबोटे, डॉ. संगीता जगताप, बागेश्री मंठाळकर, अधिसभा सदस्य सचिन गोर्डे, संदीप कदम आणि इतर संविधानिक व प्रशासकीय अधिकारी उपस्थित होते.

सिरम इन्स्टिट्यूटच्या माध्यमातून विद्यापीठात कन्व्हेन्शन सेंटर भरले जाणार होते. मात्र, त्यात वाद निर्माण झाला. परिणामी हा प्रकल्प रखडला. सिरम इन्स्टिट्यूटने कन्व्हेन्शन सेंटर उभारण्याच्या कामात पुढे जाण्यास नकार दिला. त्यामुळे या प्रकल्पात काय अडचणी आहेत, याची माहिती अजित पवार यांनी घेतली. विद्यापीठाचे कुलगुरू डॉ.सुरेश गोसावी यांनी याबाबत सादरीकरण दिले. अजित पवार यांनी विद्यापीठाच्या विकास कामांचा आढावा घेतला.त्याचप्रमाणे उपलब्ध शिक्षक व शिक्षकेतर मनुष्यबळाची माहिती घेतली. याशिवाय देशातील एकही विद्यापीठ जगातील टॉप २०० विद्यापीठांच्या यादीत नाही. सावित्रीबाई फुले पुणे विद्यापीठाने या यादीत स्थान मिळवण्यासाठी प्रयत्न करावेत. त्यासाठी राज्य शासनाकडून विद्यापीठाला सर्व प्रकारचे सहकार्य दिले जाईल, असे आश्वासनही त्यांनी दिले.

विद्यापीठाच्या प्रगतीच्या दृष्टीने विद्यार्थी केंद्रित तसेच विद्यापीठ विभाग आणि महाविद्यालयांच्या सर्वांगीण विकासाच्या दृष्टीने विद्यापीठ करीत असलेल्या नाविन्यपूर्ण योजनांची माहिती याप्रसंगी कुलगुरूंनी उपमुख्यमंत्र्यांना दिली. सावित्रीबाई फुले पुणे विद्यापीठाच्या विविध कार्याचा आढावा घेतला. तसेच या पुढच्या काळामध्ये राबविण्यात येणाऱ्या विविध योजनांच्या माहितीचे सादरीकरण देखील करण्यात आले होते.दरम्यान, शासन स्तरावर जी काही मदत प्रशासनाच्या वतीने लागेल त्यासाठी निश्चितपणे राज्य शासन सावित्रीबाई फुले पुणे विद्यापीठासोबत उभे राहील,अशी ग्वाही अजित पवार यांनी विद्यापीठास दिली.

---------------------------------------------------

राज्याचे उपमुख्यमंत्री अजित पवार यांनी विद्यापीठाच्या विकास कामांची माहिती घेण्यासाठी भेट दिली. त्यांनी विद्यापीठातील अधिकारी व व्यवस्थापन परिषद सदस्य यांच्याशी संवाद साधला. विद्यापीठाला पुढे घेऊन जाण्यासाठी शासन स्तरावरून मदत देण्याबाबत त्यांनी विद्यापीठाला आश्वासित केले. विद्यापीठाच्या विविध उपक्रमाबाबत अजित पवार यांना माहिती देण्यात आली.

- प्रा.डॉ. सुरेश गोसावी, कुलगुरू, सावित्रीबाई फुले पुणे विद्यापीठ, पुणे

------------------------------------------------------------

विद्यापीठाचे सर्व प्रलंबित प्रश्न मार्गी लागावेत या संदर्भात उपमुख्यमंत्री अजित पवार यांच्याकडे विनंती करण्यात आली. विद्यापीठातील शिक्षक व शिक्षकेतर कर्मचारी भरती प्रक्रियेतील अडचणी दूर करण्यासंदर्भात शासन स्तरावर प्रयत्न व्हावेत, अशी अपेक्षा अधिसभा सदस्य म्हणून अजित पवार यांच्याकडे व्यक्त केली.

- सचिन गोरडे पाटील, आधिसभा सदस्य सावित्रीबाई फुले पुणे विद्यापीठ