PRN Block विद्यार्थ्यांना परीक्षेची संधी देण्यास युजीसीचा नकार? राधाकृष्ण विखे पाटील यांनी दिला सल्ला
पुणे, अहमदनगर व नाशिक जिल्ह्यातील विद्यार्थ्यांचा पीआरएन क्रमांक ब्लॉक झाल्यामुळे ते परीक्षा अर्ज भरू शकत नाहीत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाशी (Savitribai Phule Pune University) संलग्न महाविद्यालयांमधील विद्यार्थी सत्र पूर्तता कालावधीत (Student session fulfillment duration) पदवी व पदव्युत्तर परीक्षा (Degree and Post Graduate Examinations) उत्तीर्ण होऊ शकले नाहीत. त्यामुळे विद्यापीठाच्या परीक्षा विभागाने त्यांचे पीआरएन क्रमांक (PRN Number) ब्लॉक केले आहेत. परंतु, पीआरएन ब्लॉक विद्यार्थ्यांना (Students) परीक्षेची संधी (Examination opportunity) उपलब्ध करून द्यावी, या मागणीचे निवेदन युवासेनेतर्फे विद्यापीठाला देण्यात आले आहे. दरम्यान, शुक्रवारी पुणे, अहमदनगर व नाशिक जिल्ह्यातील काही विद्यार्थ्यांनी विद्यापीठात गर्दी करून विद्यापीठातील अधिकाऱ्यांची व राज्याचे महसूल मंत्री राधाकृष्ण विखे पाटील यांची भेट घेतली.
मागील वर्षी विद्यापीठ प्रशासनाने विद्यापीठ अनुदान आयोगाकडे पाठपुरावा करून पीआरएन ब्लॉक विद्यार्थ्यांना परीक्षेच्या दोन संधी उपलब्ध करून दिल्या होत्या. त्यामुळे हजारो विद्यार्थी पदवी परीक्षा उत्तीर्ण होऊ शकले आणि त्यांना रोजगाराच्या संधी प्राप्त झाल्या. यावर्षी सुद्धा पुणे, अहमदनगर व नाशिक जिल्ह्यातील विद्यार्थ्यांचा पीआरएन क्रमांक ब्लॉक झाल्यामुळे परीक्षा अर्ज भरू शकत नाहीत. त्यामुळे पीआरएन ब्लॉक झालेल्या विद्यार्थ्यांना परीक्षा उत्तीर्ण होण्यासाठी दोन संधी देण्यात याव्यात, अशी मागणी राज्यातील युवासेनेचे सहसचिव कल्पेश यादव यांनी सावित्रीबाई फुले पुणे विद्यापीठाच्या कुलगुरूंना पत्रकाद्वारे केली आहे.
दरम्यान, विद्यापीठ अनुदान आयोगाच्या नियमावलीनुसार ठराविक कालावधीमध्ये विद्यार्थ्यांनी पदवी परीक्षा उत्तीर्ण होणे अपेक्षित आहे. परंतु, याबाबत विद्यार्थ्यांना विद्यापीठ किंवा महाविद्यालयाकडून कोणतीही कल्पना दिली गेली नव्हती, असेही या परिपत्रकात म्हटले आहे.
विद्यापीठात सुमारे 50 ते 60 विद्यार्थ्यांनी पीआरएन ब्लॉक केलेल्या विद्यार्थ्यांना परीक्षेसाठी संधी उपलब्ध करून द्यावी, या मागणीसाठी विद्यार्थ्यांनी विद्यापीठाचे कुलगुरू डॉ. सुरेश गोसावी व परीक्षा व मूल्यमापन मंडळाचे संचालक डॉ. महेश काकडे यांची भेट घेतली.मात्र,युजीसीने परीक्षेची संधी देण्यास नकार दिला असल्याचे काही विद्यार्थ्यांना विद्यापीठातील अधिकाऱ्यांकडून सांगण्यात आले, त्यामुळे विद्यार्थ्यांमध्ये चिंतेचे वातावरण आहे. परंतु,युजीसीतील अधिकाऱ्यांशी संपर्क साधून त्यांना परीक्षेची संधी उपलब्ध करून देण्यासाठी पाठपुरावा केला जाईल,असे कल्पेश यादव यांनी सांगितले.
------------------------------------------------------------------------
विद्यापीठात एका कार्यक्रमानिमित्त राज्याचे महसूल मंत्री राधाकृष्ण विखे पाटील आले होते.त्यावेळी पीआरएन ब्लॉक झालेल्या विद्यार्थ्यांनी त्यांची भेट घेऊन आपला प्रश्न त्यांच्या समोर मांडला. त्यावर विखे पाटील यांनी केंद्रीय मंत्री मुरलीधर मोहोळ हे उद्या पुण्यात आहेत. त्यांची भेट घेऊन केंद्रात त्यांच्या मार्फत हा प्रश्न सोडवण्यासाठी प्रयत्न करावेत,असा सल्ला विद्यार्थ्यांना दिला.
