एमआयटीच्या दोन विद्यार्थिनींचा डंपर अपघातात मृत्यू 

एज्युवार्ता न्यूज नेटवर्क 

पुण्यात शिक्षणासाठी आलेल्या दोन विद्यार्थिनीचा एका अपघात हाकनाक बळी गेल्याची संतापजनक घटना घडली आहे. हिंजवडीमध्ये भरधाव वेगाने आलेला रेडमिक्स डंपर स्कुटरवर जात असलेल्या दोन मुलींच्या अंगावर पलटी झाल्याने दोघींचा जागीच मृत्यू झाला. अपघाताची माहिती मिळताच स्थानिक पोलिसांनी घटनास्थळी धाव घेत वाहन चालकाला ताब्यात घेतले असून मुलींची ओळख पटवण्यात आली आहे. 

अपघातामध्ये मृत्यू पावलेल्या या दोन्ही बाहेरच्या जिल्ह्यातील असून त्या पुणे शहरात शिक्षणाच्या निमित्ताने आल्या असल्याची माहिती  हिंजवडी पोलिसांनी दिली आहे. अपघात होण्याचे काहीच कारण नसताना भरधाव वेगात आलेल्या डंपर चालकाच्या चुकीमुळे दोन विद्यार्थिनींचा दुर्दैवी बळी गेल्याने हळहळ व्यक्त केली जात आहे. भरधाव रेडीमिक्स डंपर वळण घेताना अचानक पलटी झाला. त्याच वेळी शेजारून दुचाकीवरून चाललेल्या दोन विद्यार्थिनी डंपरखाली सापडल्या आणि चिरडल्या गेल्या. ही घटना हिंजवडी- माण रस्त्यावरील वडजाईनगर कॉर्नरजवळ घडली आहे. 

प्रांजली महेश यादव (वय 22, रा. गोदरेज प्रॉपर्टीज्, म्हाळुंगे; मूळ रा. टेंभुर्णी, ता. माढा) आणि आश्लेषा नरेंद्र गावंडे (वय 22, रा. गोदरेज प्रॉपर्टीज्, म्हाळुंगे; मूळ रा. शेगाव, अमरावती) अशी मृत्युमुखी पडलेल्या दोन विद्यार्थिनींची नावे आहेत. या दोघी एमआयटी कॉलेजमध्ये अभियांत्रिकेच्या शेवटच्या वर्षात शिकत होत्या. अचानक झालेल्या या अपघाती मृत्यूमुळे दोन्ही कुटुंबावर दु:खाचा डोंगर कोसळला आहे.