धक्कादायक : मुजोर संस्थाचालकाने मुलीचा दाखला काढायला आलेल्या पालकाचा घेतला जीव

एज्युवार्ता न्यूज नेटवर्क

राज्यातील शैक्षणिक संस्थांकडून (Educational institutions) पालकांवर होणारे अन्याय दिवसेंदिवस वाढत आहेत. मुलीची फी भरण्यास विलंब झाल्याने मुजोर संस्थाचालकाने एका पालकाचा जीव घेतल्याचा धक्कादायक प्रकार समोर आला आहे. परभणीच्या पूर्णा तालुक्यातील झिरो फाटा येथील 'हायटेक रेसिडेन्शिअल स्कूल'मध्ये (Hitech Residential School) ही घटना घडली आहे. जगन्नाथ पांडुरंग हेंडगे (वय ३७ वर्षे) असे मृत (Jagannath Pandurang Hendage dies) पालकाचे नाव आहे. या प्रकरणी संस्थाचालक प्रभाकर चव्हाण (School Director Prabhakar Chavan) याच्याविरोधात गुन्हा दाखल झाला आहे.

MPSC : लिपिक-टंकलेखक मुख्य परीक्षेचा निकाल जाहीर, सोलापूरचा तन्मय कटुळे राज्यात प्रथम

जगन्नाथ पांडुरंग हेंडगे यांनी आपली मुलगी पल्लवी हिचा प्रवेश हायटेक रेसिडेन्शिअल शाळेत घेतला होता. मात्र तिथे काही दिवस राहिल्यानंतर मला इथे नको म्हणत गावातील शाळेतच टाका असा तगादा मुलीने पालकांकडे लावला. त्यावरून तिचे वडील जगन्नाथ हेंडगे हे आपल्या मुलीची टीसी काढण्यासाठी हायटेक शाळेत गेले. यावेळी संस्थाचालक असलेल्या प्रभाकर चव्हाण यांना हेंडगे यांनी शाळेची उर्वरित फी भरा तेव्हाच टीसी देण्यात येईल असे सांगितले. तर पालक जगन्नाथ हेंडगे यांनी यापुर्वी भरलेली फी संस्थाचालकांकडे मागितली. यावरून दोघांमध्ये बाचाबाची आणि नंतर मोठा वाद झाला त्यातच त्यांचा मृत्यू झाला आहे.

या अगोदर देखील या मुजोर संस्थाचालक आणि संस्थेचे अनेक वाद समोर आले होते. मात्र, त्यावेळी कोणतीही ठोस कारवाही झाली नसल्याने हा भयंकार प्रकार समोर आला आहे. पूर्णा तालुक्याच्या झिरो फाटा, एरंडेश्वर येथे असलेल्या हायटेक रेसिडेन्शिअल स्कूलचे संस्थाचालक प्रभाकर चव्हाण आणि त्याच्या पत्नीने केलेल्या मारहाणीत जगन्नाथ हेंडगे यांचा मृत्यू झाल्याची तक्रार त्यांच्या नातेवाईकांनी पूर्णा पोलीस ठाण्यात केली आहे. या प्रकरणात संस्थाचालक प्रभाकर चव्हाण याच्यावर गुन्हा दाखल झाला आहे. प्रकरणात पुढील तपास पोलीस करत आहेत.