सरकारचा मोठा निर्णय! आता प्रत्येक शाळेत प्रशिक्षणार्थी शिक्षकाची नियुक्ती होणार.. 

एज्युवार्ता न्यूज नेटवर्क 

राज्य सरकारने एक महत्त्वपूर्ण निर्णय घेतला आहे. ज्याद्वारे राज्यातील प्रत्येक शाळेत एका प्रशिक्षणार्थी विद्यार्थ्याची शिक्षक म्हणून निवड (Trainee Teacher Selection) करण्यात येणार आहे. त्यानुसार  मुख्यमंत्री युवा कार्य प्रशिक्षण योजनेंतर्गत (CM Youth Work Training Scheme) शिकाऊ प्रशिक्षणार्थीची  थेट निवड करण्याच्या सूचना मुख्याध्यापकांना देण्यात आल्या आहेत. 

काही शाळांमध्ये आलेल्या अर्जाची छाननी करून सर्वांत जास्त शिक्षण घेतलेल्या पात्र उमेदवारांची निवड करण्यात येत आहे. तर काही ठिकाणी केवळ सोपस्कार गोष्टी पुढे ठेवून निवडी केल्या जात आहेत. परंतु, या निवडीवरून गावागावांत राजकारण होत असून एकाची निवड केली तर दुसरा नाराज यामुळे गटागटाने मुख्याध्यापकांवर निशाणा साधून तक्रारी केल्या जात असल्याचे चित्र राज्यभर पाहण्यास मिळत आहे. 

काही ठिकाणी गावातील राजकीय गट मुख्याध्यापकांवर दबाव टाकून निवडीसाठी शिफारस करीत आहे. त्यामुळे निवड केली किंवा नाही केली तरी आरोपाचे धनी होण्याची वेळ मुख्याध्यापकांवर आली आहे. शिक्षक भरतीमधील त्रुटी दूर करून जिल्हा, विभाग स्तरावर शिक्षक भरती प्रक्रियेबाबतचा अभ्यास करून कार्यपद्धती सुचविण्यासाठी शिक्षण आयुक्तांच्या अध्यक्षतेखाली अभ्यासगट नियुक्त होईल, असे निर्देश देण्यात आले आहेत. 

भरतीसाठी पवित्र पोर्टलवर अर्ज करताना एकाच जिल्ह्यासाठी अर्ज करण्याची संधी उमेदवाराला मिळणार आहे. पात्र उमेदवारांची राज्यस्तरावर निवड न करता प्रत्येक जिल्ह्यात स्वतंत्र निवड यादी तयार केली जाणार आहे. मुख्यमंत्री युवा कार्य प्रशिक्षण योजनेअंतर्गत शिकाऊ प्रशिक्षणार्थीची थेट निवड करण्यात येणार आहे. या माध्यमातून सुशिक्षित बेरोजगारांच्या हाताला काम दिले जाणार आहे.