नामांकित खासगी विद्यापीठात बांगलादेशी झेंडे फडकल्याने वाद; पोलिसांकडे तक्रार

एज्युवार्ता न्यूज नेटवर्क 

कोथरूडमधील MIT या नामांकित विद्यापीठातील (MIT University) आयोजित 'वर्ल्ड कल्चरल फेस्टिव्हल' (World Cultural Festival) वादाच्या भोवऱ्यात सापडले आहे. या कार्यक्रमात चक्क परदेशी विद्यार्थ्यांचे खोट्या तलवारींसह केलेले सादरीकरण (Student performance with swords) आणि बांगलादेशी झेंडे फडकल्याने (Bangladeshi flags fluttered) नव्या वादाला तोंड फुटले आहे. बांगलदेशी विद्यार्थ्यांनी लावलेल्या फूड स्टॉलमुळे भाजप युवा मोर्चा आणि महाविद्यालय प्रशासन (BJP Yuva Morcha against college administration) आमनेसामने आले आहेत. याबाबत विद्यापीठ प्रशासनाने पोलिसांकडे तक्रार दिली आहे.

या महोत्सवात जगभरातील विद्यार्थी आपल्या देशाचे प्रतिनिधित्व करत होते. वादाची पहिली ठिणगी पडली ती सुदानच्या विद्यार्थ्यांच्या सादरीकरणामुळे आपल्या लोककलेचे दर्शन घडवताना या विद्यार्थ्यांनी चक्क हातात खोट्या तलवारी घेऊन नृत्य केले. इतकेच नव्हे, तर एका विद्यार्थ्याने तलवार तोंडात धरल्याचा व्हिडिओ व्हायरल झाला आहे. बांगलादेशी विद्यार्थ्यांनी लावलेल्या फूड स्टॉलने तसेच बांगलादेशचा झेंडा लावला या मुद्याने राजकीय वळण घेतले. 

सध्या बांगलादेशात सुरू असलेल्या घडामोडी आणि भारतीय हितसंबंधांवर होणारे परिणाम लक्षात घेता, स्थानिक विद्यार्थ्यांनी हा स्टॉल लावू नये, अशी विनंती पत्राद्वारे प्रशासनाला केली होती. मात्र, प्रशासनाने याकडे दुर्लक्ष केल्याचा आरोप करत भाजयुमोच्या कार्यकर्त्यांनी हा स्टॉल हटवला आणि बांगलादेशच्या ध्वजाचा फोटो जाळत होळी करत जोरदार घोषणाबाजी केली.  

_____________________________________________________

विद्यापीठात 10 फेब्रुवारी रोजी वर्ल्ड कल्चरल डे आयोजित करण्यात आला होता. वसुधैव कुटुम्बकम हा उद्देश समोर ठेवून या कार्यक्रमाचे आयोजन करण्यात आले होते. या कार्यक्रमात सर्व देशांचे विद्यार्थी आपली खाद्य संस्कृती सादर करतात यामधून विद्यापीठातील इतर विद्यार्थी यांचे संभाषण घडून येते. अनेक नामांकित विद्यापीठांमध्ये अशा पद्धतीचे कार्यक्रम होतात. विद्यापीठामध्ये शिक्षण घेण्यासाठी आलेल्या आंतरराष्ट्रीय विद्यार्थ्यांच्या व्यक्तिमत्व विकासाचा भाग म्हणून असे कार्यक्रम घेतले जातात. या फूड फेस्टिवल मध्ये काही तरुणांनी येऊन एका विशिष्ट स्टॉलची तोडफोड केली याचा आम्ही निषेध करतो. यासंदर्भात आम्ही पोलिसांकडे तक्रार दाखल केली आहे.

गणेश पोकळे, कुलसचिव, MIT विद्यापीठ, पुणे 

------------

भारत हा सार्वभौम देश असून आपल्या प्रत्येक शैक्षणिक संस्थेत राष्ट्रीय एकात्मता, संविधानिक मूल्ये आणि देशाभिमान जोपासला गेला पाहिजे. कॉलेज परिसरात बांगलादेशी प्रचार कसा होऊ शकतो व झेंडा कसा, कोणाच्या परवानगीने आणि कोणत्या उद्देशाने लावण्यात आला, याची तातडीने चौकशी होणे आवश्यक आहे. या प्रकरणी संबंधित कॉलेज प्रशासनावर त्वरित कारवाई झाली पाहिजे हीच आम्हा सर्वांची मागणी आहे. 

- दुष्यंत मोहोळ, अध्यक्ष, भाजपा युवा मोर्चा, पुणे

----------