मुंबईतील नामांकित शाळेतील धक्कादायक प्रकार, केस नीट न कापल्यामुळे विद्यार्थ्यांना परीक्षेला बसू दिले नाही

एज्युवार्ता न्यूज नेटवर्क

मुंबईत विद्यार्थ्यांच्या शिक्षणाशी खेळ केल्याचा धक्कादायक प्रकार समोर आला आहे. चर्नी रोड परिसरातील नामांकित सेंट तेरेसा हायस्कूलमध्ये (Sent Teresa High School) शिस्तीच्या नावाखाली विद्यार्थ्यांना थेट परीक्षेपासून वंचित ठेवल्याने (Students were barred from taking the exam) शिक्षण क्षेत्रात खळबळ उडाली आहे. शाळेने ठरवून दिलेल्या नियमांनुसार विद्यार्थ्यांनी केस कापले नाहीत, या कारणावरून अनेक विद्यार्थ्यांना चक्क परीक्षेला बसू न दिले आहे. या प्रकारामुळे पालकांनी संताप (Outrage among parents) व्यक्त केला असून, सदरील घटनेचा व्हिडीओ सोशल मीडियावर प्रचंड व्हायरल (Video goes viral on social media) होत आहे.

मिळालेल्या माहितीनुसार, शाळेने विद्यार्थ्यांसाठी काही विशिष्ट नियम लागू केले आहेत. परीक्षेच्या दिवशी सकाळी जेव्हा विद्यार्थी शाळेत पोहोचले, तेव्हा शिक्षकांनी त्यांच्या केसाची तपासणी केली. ज्या विद्यार्थ्यांचे केस नियमापेक्षा लांब होते किंवा ज्यांची हेअरस्टाईल अयोग्य वाटली, अशा विद्यार्थ्यांना वर्गाबाहेर काढण्यात आले. पालकांचा आरोप आहे की, विद्यार्थ्यांना परीक्षेला बसू देण्याऐवजी त्यांना वर्गाबाहेर बसवण्यात आले, ज्यामुळे त्यांचा महत्त्वाचा पेपर हुकला. केस कापले नाहीत म्हणून मुलांची वर्षभराची मेहनत वाया घालवणार का? असा संतप्त सवाल एका पालकाने व्हिडिओमध्ये विचारला आहे. 

पालकांच्या मते शिस्त लावण्याचे इतरही मार्ग असू शकतात, पण परीक्षेला बसू न देणे हे विद्यार्थ्यांच्या मानसिकतेवर आणि शैक्षणिक भवितव्यावर परिणाम करणारे आहे. घटनेचा व्हिडीओ सोशल मिडीयावर व्हायरल झाल्यानंतर शाळेवर सडकून टीका केली जात आहे. मुंबई महापालिका आणि शिक्षण विभागाने या प्रकरणाची गंभीर दखल घेण्याची मागणी पालकांनी केली असून शाळा प्रशासनाकडून या घटनेवर अद्याप कोणतीही प्रतिक्रिया देण्यात आली नाही.