राज्यातील शिक्षकांची स्वतंत्र प्रोफाईल तयार होणार, एका क्लिकवर मिळणार सर्व माहिती

एज्युवार्ता न्यूज नेटवर्क

नागपूरमध्ये बनावट शालार्थ आयडीतील घोटाळा (Shalarth ID Scam) समोर आल्यानंतर शिक्षण क्षेत्रात खळबळ उडाली होती. मात्र, भविष्यात असे गैरप्रकार घडू नयेत, यासाठी माध्यमिक शिक्षण विभागाने (Department of Secondary Education) मोठा निर्णय घेतला आहे. राज्यातील सर्व १७ हजार माध्यमिक व उच्च माध्यमिक शाळांमधील प्रत्येक शिक्षकाचे स्वतंत्र प्रोफाईल (Individual teacher profile) तयार केले जाणार आहे. यामध्ये जवळपास ३ लाख शिक्षकांची संपूर्ण माहिती समाविष्ट केली जाणार असून ही माहिती एका क्लिकवर पाहाता येणार आहे. 

राज्यातील सर्व खासगी माध्यमिक शाळांमधील सुमारे ३ लाख शिक्षकांच्या कागदपत्रांच्या पडताळणीचा निर्णय झाला. शालार्थ आयडीतील घोटाळा शोधण्यासाठी राज्य शासनाने 'एसआटी' स्थापन केली आहे. पुण्याचे विभागीय आयुक्त डॉ. चंद्रकांत पुलकुंडवार यांच्या अध्यक्षतेखाली ही समिती काम करीत आहे. समितीचा अहवाल पुढील दोन महिन्यात राज्य सरकारला सादर होण्याची अंदाज वर्तवण्यात आला आहे.  

एका बाजूला चौकशी सुरू असताना दुसऱ्या बाजूला शिक्षण विभागाच्या अखत्यारीतील सर्व शाळांमधील शिक्षकाची माहिती एका क्लिकवर अधिकाऱ्यांना उपलब्ध व्हावी, यासाठी त्यांचे प्रोफाईल बनविण्याचा निर्णय घेतला आहे. ही प्रक्रिया लवकरच सुरू होणार असून शिक्षकाची संपूर्ण माहिती मुख्याध्यापक व संबंधित शिक्षकांकडून घेतली जाणार आहे. त्यासाठी स्वतंत्र पोर्टल तयार केले जाणार असून, त्यात शिक्षकांना माहिती भरण्याची सोय उपलब्ध करून दिली जाणार आहे.