सारथी, बार्टी, महाज्योती शिष्यवृत्ती घेऊन विद्यार्थ्यांनी परदेशी शिक्षण घ्यावे; छगन भुजबळ

एज्युवार्ता न्यूज नेटवर्क 

विद्यार्थ्यांना राज्य शासनाकडून सारथी, बार्टी, महाज्योतीच्या (Sarathi, Barti, Mahajyoti Scholarship) माध्यमातून परदेशी शिक्षण घेण्यासाठी शिष्यवृत्ती देण्यात येते. विद्यार्थ्यांनी या शिष्यवृत्ती योजनेचा लाभ घेऊन आपले परदेशी उच्च शिक्षण (Foreign higher education) पूर्ण करावे, असे आवाहन राज्याचे अन्न व नागरी पुरवठा मंत्री छगन भुजबळ (Chhagan Bhujbal) यांनी केला आहे.  तंत्रज्ञानाने जग जवळ आले आहे. विद्यार्थ्यांना भविष्यात अन्य देशांमध्ये करिअरच्या विविध संधी उपलब्ध होत आहेत. या स्पर्धेत टिकण्यासाठी विद्यार्थ्यांनी विविध भाषा अवगत (Students learn different languages) कराव्यात. विद्यार्थ्यांनी विविध क्षेत्रात प्रावीण्य मिळवावे, असे मंत्री भुजबळ म्हणाले. 

मंत्री भुजबळ यांच्या हस्ते नाशिक जिल्ह्यातील अंदरसूल जिल्हा परिषद मुलींच्या शाळेच्या नूतन इमारतीचे भूमिपूजन करण्यात आले. यावेळी त्यांनी मुलींच्या शाळेला भेट देऊन विद्यार्थिनी आणि शिक्षकांसोबत संवाद साधला. अंदरसूल जिल्हा परिषदेच्या या शाळेतून विद्यार्थी शालेय जीवनापासूनच सारथी, बार्टी, महाज्योती या शिष्यवृत्तीसाठी तयारी करत आहे. ही बाब अतिशय कौतुकास्पद असून यामध्ये शिक्षकांचे योगदान अतिशय महत्त्वाचे आहे. मुलींच्या शिक्षणासाठी क्रांतिज्योती सावित्रीबाई फुले यांनी अतिशय महत्त्वाचे कार्य केले आहे. त्यामुळे आज मुली विविध क्षेत्रात प्राविण्य मिळवत आहे. त्यांच्या कार्याची प्रेरणा घेऊन मुलींनी उच्च शिक्षण घेऊन विविध क्षेत्रात प्राविण्य मिळवावे, असे आवाहन मंत्री भुजबळ यांनी केले.

या सोहळ्याप्रसंगी अंदरसूल जिल्हा परिषद शाळेतील मुलींनी जपानी भाषेतून अनोख्या पद्धतीने मंत्री भुजबळ यांचे स्वागत केले. तसेच या शाळेतील विद्यार्थिनींनी कोडिंग- डिकोडिंग च्या माध्यमातून तयार करण्यात आलेल्या ऍप्लिकेशनचे सादरीकरण केले. तसेच इयत्ता चौथीत शिक्षणाऱ्या विद्यार्थिनीने २७ अंकी आकड्यांचे वाचन उपस्थितांसमोर सादर केले.