विद्यार्थ्यांना प्रतिज्ञापत्रासाठी लागणारा ५०० रुपयांचा मुद्रांक शुल्क माफ 

एज्युवार्ता न्यूज नेटवर्क 

काही दिवसांपूर्वी महसूल विभागाने मुद्रांक शुल्काच्या दरात १०० रूपयांवरून ५०० रुपये एवढी मोठी वाढ करण्याचा निर्णय घेतला होता. पण याचा सर्वाधिक फटका हा विद्यार्थ्यांना बसत होता. कारण शैक्षणिक शपथपत्रासाठी (Educational Affidavit) १०० रूपयांऐवजी ५०० रुपये खर्च होत होते.  मात्र, आता विद्यार्थ्यांना मोठा दिलासा देणारा निर्णय महसूल मंत्री चंद्रशेखर बावनकुळे (Revenue Minister Chandrashekhar Bawankule) यांनी घेतला आहे. विद्यार्थ्यांना ५०० रुपयांचं मुद्रांक शुल्क माफ (Stamp duty of Rs 500 waived off for students) करण्यात येणार असल्याची माहिती बावनकुळे यांनी दिली आहे. 

विद्यार्थ्यांना विविध शैक्षणिक कारणास्तव अनेकदा प्रतिज्ञापत्र सादर करावे लागतात. जात प्रमाणपत्र, जात पडताळणी प्रमाणपत्र, नाॅन क्रिमीलिअर प्रमाणपत्र, उत्पानाचा दाखला, ईडब्ल्यू प्रमाणपत्र यांसारख्या कागदपत्रांसाठी प्रतिज्ञापत्र देणे आवश्यक असते. प्रतिज्ञापत्र ज्या मुद्रांकावर प्रिंट केले जातात त्या मुद्रांकाचे दर सरकारने वाढवले होते. ते १०० रुपयांवरून थेट ५०० रुपये करण्यात आले होते. तसेच यामध्ये टायपिंगसाठी किमान ५० रुपये आणि नोटरी असलेल्या वकिलाची फी १०० ते १५० किंवा त्यापेक्षा अधिक घेतली जात असल्याने एका प्रतिज्ञापत्रासाठी विद्यार्थ्यांना ७०० रुपये किंवा १००० रुपयांपर्यंत खर्च येत होता. मात्र, आता या निर्णयांमुळे त्याला लगाम लागणार आहे. 

पूर्वी १०० रुपयांचा मुद्रांक असताना जो खर्च साधारण २५० रुपयांपर्यंत यायचा तो ५०० रुपयांच्या मुद्रांक शुल्कासाठी थेट १००० रुपयांवर गेल्याने विद्यार्थी आणि पालकांमध्ये मोठी नाराजी होती. शैक्षणिक कारणासाठी हा खर्च परवडणारा नसल्याने त्यावर सरकारने काहीतरी तोडगा काढावा ही मागणी होत होती. या मागणीनुसार आता सरकारने  विद्यार्थ्यांना दिलासा देण्याचा निर्णय घेतला आहे त्यानुसार, विद्यार्थांना आता मुद्रांक शुल्क माफ करण्यात आला असल्याची माहिती महसूल मंत्री चंद्रशेखर बावनकुळे यांनी माध्यमांना दिली आहे.