दहावीच्या मुलांकडून ५वी, ७वीच्या मुलांना गुंगीचे औषध देऊन लैंगिक अत्याचार

एज्युवार्ता न्यूज नेटवर्क

नाशिक जिल्ह्यातील एका मुलांच्या वसतिगृहात (Children's hostel) किळसवाणी घटना घडल्याचे उघड झाले आहे. येथील इयत्ता दहावीत शिक्षण घेणाऱ्या विद्यार्थ्यांनी त्यांच्यासोबत असलेल्या ५ वी ते ७ वी शिक्षण घेणाऱ्या काही विद्यार्थ्यांना (Students of 5th to 7th Class) आधी गुंगीचे औषध दिले. त्यानंतर लैंगिक अत्याचार (Sexual assault) केल्याचे समोर आले आहे. या घटनेमुळे पालकांमध्ये संताप पाहायला मिळत आहेत. 

मिळालेल्या प्राथमिक माहितीनुसार, नाशिकच्या इगतपुरी येथील समाजकल्याण विभागाचे वसतिगृह आहे. याच वसतीगृहात राहाणाऱ्या दहावीतील मुलांनी रात्रीच्या वेळी ५ वी ते ७ वीच्या काही मुलांवर अनैसर्गिक कृत्य केल्याचे सांगण्यात आले आहे. पीडित मुलांनी आपल्या पालकांना हा प्रकार सांगितला. यानंतर पालकांसह विद्यार्थ्यांनी गुन्हा दाखल करण्यासाठी इगतपुरी पोलिस ठाणे गाठले. या घटनेमुळे समाजकल्याण विभागाच्या वसतिगृहात शिक्षण घेणाऱ्या विद्यार्थ्यांच्या सुरक्षेबाबात प्रश्नचिन्ह निर्माण झाले आहे.

संबंधित विद्यार्थ्यांवर गुन्हा दाखल करण्यासाठी पालक इगतपुरी पोलिस ठाण्यात गेले. मात्र, सध्या आरोपी विद्यार्थ्यांच्या दहावी बोर्डाच्या परीक्षा सुरू असल्याने काही मार्ग निघतोय का? अशी भुमिका पोलिसांची पाहायला मिळाली. मात्र, पिडित विद्यार्थ्यांच्या पालकांनी इगतपुरी पोलिस तक्रार घेण्यास टाळाटाळ करत असल्याचा आरोप केला आहे. 

पालकांनी वसतिगृह व्यवस्थापनाकडे विचारणा केली असता कोणताही सकारात्मक प्रतिसाद मिळालेला नाही,असा आरोप पालकांनी केला. हा प्रकार अतिशय गंभीर असून विद्यार्थ्यांसह वसतिगृह व्यवस्थापनावर देखील कापवाई व्हावी, अशी मागणी पालकांनी केली आहे. अशातच, गुन्हा दाखल करण्यास पोलिस टाळाटाळ करत असल्याने पोलिसांची भूमिका संशयास्पद असल्याची चर्चा आहे.