PIBM तर्फे आंतरराष्ट्रीय परिषदेचे आयोजन

 एज्युवार्ता न्यूज नेटवर्क 

विद्येचे माहेरघर म्हणून ओळखल्या जाणाऱ्या पुण्यात आंतरराष्ट्रीय स्तरावरील परिषदेचे आयोजन करण्यात आले आहे. Pune Institute of Business Management (PIBM) तर्फे “From Education to Employment: Building Future-Ready Youth in BRICS & Other Partner Countries” या विषयावर आंतरराष्ट्रीय परिषद येत्या ५ मार्च २०२६ रोजी दुपारी २.३० ते सायं. ५.३० या वेळेत पिरंगुट येथील PIBM च्या कॅम्पसमध्ये आयोजित करण्यात आली आहे. या परिषदेत विविध देशांचे राजनैतिक प्रतिनिधी, धोरणकर्ते, उद्योगतज्ज्ञ आणि शैक्षणिक क्षेत्रातील मान्यवर सहभागी होणार आहेत.

स्मॉल अँड मीडियम एंटरप्रायझेस (SME) क्षेत्राची स्पर्धात्मकता, तंत्रज्ञान विकास आणि युवकांची कौशल्यवृद्धी यांच्या माध्यमातून सकल देशांतर्गत उत्पादन (GDP) वाढीस कशी चालना देता येईल, यावर परिषदेत सखोल चर्चा होणार आहे. तसेच दीर्घकालीन आर्थिक विकासासाठी जागतिक स्तरावर स्पर्धात्मक उद्योगांची उभारणी आणि मजबूत SME परिसंस्था अत्यावश्यक असल्याचा परिषदेमागील मुख्य उद्देश आहे. आंतरराष्ट्रीय आर्थिक अभ्यासानुसार, सातत्यपूर्ण प्रगती साधणाऱ्या देशांनी कौशल्याधारित मनुष्यबळ, औद्योगिक उत्पादकता आणि निर्यातकेंद्रित व्यवसाय पद्धतींमध्ये सातत्याने गुंतवणूक केली आहे. त्यामुळे SMEs हे रोजगारनिर्मिती व नवोन्मेषाचे प्रमुख इंजिन ठरले आहेत.

परिषदेत ‘सेक्टर-स्पेसिफिक बिझनेस सोल्यूशन सेंटर्स ऑफ एक्सलन्स’ स्थापन करण्याचा प्रस्तावही मांडण्यात येणार आहे. उद्योग, शिक्षणसंस्था आणि तंत्रज्ञान भागीदार यांच्या संयुक्त सहभागातून ही केंद्रे उभारण्याची संकल्पना आहे. या माध्यमातून क्षेत्रनिहाय तंत्रज्ञान उपाययोजना विकसित करणे, जागतिक दर्जाच्या व्यवसाय प्रक्रियांद्वारे उत्पादकता वाढवणे, निर्यात क्षमतेत सुधारणा करणे आणि उद्योगाभिमुख कौशल्ये विकसित करणे यावर भर दिला जाणार आहे. भारतीय उद्योगांना जागतिक बाजारपेठेत सक्षम करण्यासोबतच रोजगारनिर्मितीलाही चालना देण्याचा या उपक्रमाचा उद्देश आहे.

परिषदेचे मुख्य संरक्षक व पीआयबीएम समूहाचे अध्यक्ष आणि कार्यकारी संचालक डॉ. रमण प्रीत सिंग म्हणाले, “शिक्षण व्यवस्था, उद्योगक्षमता आणि आंतरराष्ट्रीय भागीदारी यांचा समन्वय साधून सक्षम युवक व जागतिक स्तरावर स्पर्धात्मक SME उभारण्यासाठी एक संयुक्त कृती आराखडा तयार करणे, हा या परिषदेचा मुख्य उद्देश आहे.”

या परिषदेचे प्रमुख पाहुणे म्हणून प्रादेशिक पासपोर्ट अधिकारी, पुणे, डॉ. विनोदकुमार दामोदर गायकवाड उपस्थित राहणार असून, विशेष पाहुणे म्हणून खासदार श्रीरंग बारणे उपस्थित राहणार आहेत.

मलेशिया, रशियन फेडरेशन, युगांडा, बोलिव्हिया, बेलारूस, क्युबा, नायजेरिया, दक्षिण आफ्रिका, चीन, चाड, केनिया, सेनेगल आणि कझाकिस्तान या देशांतील मान्यवर प्रतिनिधी परिषदेत सहभागी होणार आहेत. शिक्षण, शासन आणि जागतिक उद्योग क्षेत्र यांच्यातील संवादाच्या माध्यमातून शिक्षण ते रोजगार हा दुवा अधिक मजबूत करणे, SME परिसंस्था बळकट करणे आणि उदयोन्मुख अर्थव्यवस्थांना जागतिक स्पर्धेसाठी सज्ज करणे, हा या आंतरराष्ट्रीय परिषदेचा प्रमुख उद्देश आहे.