शाळांना सुट्टी नाही; 18, 19 नोव्हेंबरला शाळा सुरूच राहणार : शिक्षण आयुक्त सूरज मांढरे

एज्युवार्ता न्यूज नेटवर्क

विधानसभा निवडणुकीच्या (Assembly Elections)पार्श्वभूमीवर राज्याच्या उपसचिवांनी प्रसिद्ध केलेल्या परिपत्रकात तीन दिवस शाळांना सुट्टी देण्याबाबत उल्लेख केला होता. मात्र,राज्यातील शाळा 18 आणि 19 नोव्हेंबर रोजी सुरूच राहणार आहेत. या कालावधीत शाळांना सार्वत्रिक सुट्टी (School holidays) जाहीर करण्यात आलेली नाही. केवळ ज्या शाळेतील सर्व शिक्षकांची नियुक्ती निवडणूक कामासाठी झाली असल्यामुळे एकही शिक्षक शाळेत उपलब्ध असणार नाही, अशा शाळांबाबत स्थानिक स्तरावर मुख्याध्यापकांनी त्यांच्या अधिकारात सुट्टी जाहीर करावी, अशा सूचना देण्यात आल्या आहेत, असे राज्याचे शिक्षण आयुक्त सुरज मांढरे (State Education Commissioner Suraj Mandhare)यांनी कळविले आहे.

विधानसभा निवडणुकीच्या पार्श्वभूमीवर शाळांना सुट्टी जाहीर करण्यासंदर्भात शासनाकडून पत्रक प्रसिद्ध करण्यात आले होते. येत्या 18, 19 व या तीन दिवशी शाळांना सुट्टी घेण्याबाबत मुख्याध्यापकांनी निर्णय घ्यावा, असा उल्लेख या परिपत्रकामध्ये करण्यात आला होता. परंतु, आवश्यकता नसताना 18 नोव्हेंबर रोजी सुट्टी जाहीर करणे चुकीचे आहे, अशी चर्चा शिक्षण वर्तुळात केली जात होती. मात्र, त्यावर राज्याचे शिक्षण आयुक्त सुरज मांढरे यांनी कोणत्या शाळांना सुट्टी राहील याबाबत माहिती स्पष्टपणे दिली आहे.

सूरज मांढरे म्हणाले, 18 व 19 रोजी सर्व शाळा सुरू राहतील. कोणतीही सार्वत्रिक सुट्टी जाहीर केलेली नाही.ज्या शाळेतील सर्व शिक्षकांची नियुक्ती निवडणूक कामासाठी झाल्या असून एकही शिक्षक शाळेत उपलब्ध असणार नाही, अशा शाळाबाबत मुख्याध्यापक यांनी त्यांचे अधिकारात सुट्टी जाहीर करावी.अशा शाळा वगळता उर्वरित सर्व शाळा नियमितपणे सुरू राहतील. केवळ परिस्थिती विचारात घेऊन विशिष्ट शाळांना स्थानिक पातळीवर मुख्याध्यापक यांनी सुट्टी द्यावी,अशा सूचना आहेत. ही सरसकट व सार्वजनिक सुट्टी नाही, याची नोंद सर्वांनी घ्यावी. तसेच कोणत्याही शाळा अनावश्यकरीत्या बंद राहणार नाहीत, याचीही दक्षता घेण्याबाबतच्या सूचना सर्व शिक्षणाधिकारी यांना देण्यात आल्या आहेत. 

--------------------------------------