'सावित्रीबाई फुले की ज्योती कलानी?' विद्यार्थिनींसाठीची योजना सापडली राजकीय वादात

एज्युवार्त न्यूज नेटवर्क 

उल्हासनगरमध्ये विद्यार्थिनींच्या भवितव्यासाठी मांडलेली योजना (Student Scheme) नावाच्या श्रेयवादामुळे राजकारणांच्या भोवऱ्यात आडकल्याचे पाहायला मिळत आहे. एकीकडे विद्यार्थिनींना आर्थिक मदतीचा (Financial assistance to female students) दिलासा देणारी योजना, दुसरीकडे तिच्या नामकरणावरून चर्चेत आली आहे. योजनेला क्रांतीज्योती सावित्रीबाई फुले (Savitribai Phule Scheme) की ज्योती कलानी यांचे नाव द्यायचे या मतभेदामुळे विद्यार्थ्यांचे नुकसान तर होणार नाही ना? अशी चिंता पालकांना लागली आहे. 

उल्हासनगर महापालिकेत 'विद्यार्थिनी योजना' या महत्त्वाकांक्षी प्रस्तावावरून मोठा वाद निर्माण झाला. शिवसेना गटाने कक्षा ७वी ते १२वीपर्यंतच्या विद्यार्थिनींसाठी ही योजना मांडत, तिला माजी आमदार स्वर्गीय ज्योती कलानी यांचे नाव देण्याचा प्रस्ताव ठेवला. या योजनेनुसार विद्यार्थिनींना शिक्षणासाठी दरमहा ५०० रुपये थेट त्यांच्या बँक खात्यात जमा करण्याची तरतूद करण्यात आली आहे.

मात्र, या नामकरणावर भाजप गटाने आक्षेप घेत, योजनेला समाजसुधारक क्रांतीज्योती सावित्रीबाई फुले यांचे नाव देण्याची मागणी केली. यावर शिवसेना गटाने कलानी यांच्या नावावर ठाम भूमिका घेतल्याने दोन्ही पक्षांमध्ये तीव्र वाद निर्माण झाला. विद्यार्थिनींच्या हितासाठी असलेली योजना राजकीय वादात अडकली असून तिच्या अंमलबजावणीबाबत संभ्रम निर्माण झाला आहे. आता प्रशासन कोणत्या नावाने ही योजना राबवते याकडे सर्वांचे लक्ष लागले आहे.