SRTMU आणि SPPU पेट परीक्षा एकाच दिवशी?; कुलगुरूंच्या स्पष्टीकरणाने गोंधळ मिटला

एज्युवार्ता न्यूज नेटवर्क

सावित्रीबाई फुले पुणे विद्यापीठामार्फत (SavitribaiPhule Pune University ) घेण्यात येणारी पेट परीक्षेची (PET Exam) तारीख पुढे ढकलण्यात यावी अशी मागणी विद्यार्थ्यांकडून (Students) केली जात आहे.कारण  ‘महाराष्ट्र बंद’मुळे (Maharashtra closed) 24 ऑगस्ट रोजीची पेट परीक्षा पुढे ढकलण्यात आली. आता येत्या ३१ ऑगस्ट रोजी ही परीक्षा घेण्यात येणार आहे. मात्र, याच दिवशी नांदेड येथील स्वामी रामानंद तीर्थ मराठवाडा विद्यापीठाची ( Swami Ramanand Tirtha Marathwada University, Nanded) पेट परीक्षा (PET Exam) होणार असल्याची माहिती विद्यापीठाच्या संकेत स्थळावर देण्यात आली आहे. त्यामुळे विद्यार्थ्यांमध्ये चिंतेचे वातावरण आहे. मात्र, यावर स्वामी रामानंद तीर्थ मराठवाडा विद्यापीठाचे कुलगुरू डॉ. एम.जी.चासकर यांनी 'एज्युवार्ता'शी बोलताना पेट परीक्षा 31 ऑगस्ट रोजी होणार नसल्याचे स्पष्टीकरण दिले आहे. 

नेट परीक्षेच्या गुणांच्या आधारे पीएचडी प्रवेश दिले जाणार असल्याची घोषणा या पूर्वी करण्यात आली आहे. त्यामुळे विद्यापीठांमार्फत घेतली जाणारी पेट परीक्षा ही शेवटची परीक्षा असण्याची शक्यता आहे. अनेक विद्यार्थ्यांनी सावित्रीबाई फुले पुणे विद्यापीठ व स्वामी रामानंद तीर्थ मराठवाडा विद्यापीठ या दोन्ही विद्यापीठांच्या पेट परीक्षेसाठी (PET) अर्ज केले आहेत. त्यामुळे या परीक्षा एकाच दिवशी घेतल्या गेल्या तर, कोणत्याही एका परीक्षेला विद्यार्थ्यांना मुकावे लागेल,असा संभ्रम निर्माण झाला होता. परंतु, विद्यापीठाचे कुलगुरू डॉ. एम.जी.चासकर यांनी स्वामी रामानंद तीर्थ मराठवाडा विद्यापीठाची पेट परीक्षा 31 ऑगस्ट रोजी होणार नसल्याचे सांगितले आहे.

दरम्यान, स्वामी रामानंद तीर्थ मराठवाडा विद्यापीठामार्फत घेण्यात येणारी पेट परीक्षा साधारणपणे ३१ ऑगस्ट रोजी घेण्यात येणार असल्याची माहिती या विद्यापीठाने आपल्या अधिकृत संकेतस्थळावर उपलब्ध केली आहे. त्यामुळे विद्यार्थ्यांमध्ये चिंतेचे वातावरण निर्माण झाले आहे. मात्र, आता कुलगुरूंनी यावर स्पष्टीकरण दिल्यामुळे अनेक विद्यार्थ्यांना दिलासा मिळणार आहे. त्यामुळे सर्व विद्यार्थ्यांना सावित्रीबाई फुले पुणे विद्यापीठाची पेट परीक्षा देता येणार आहे.