बीएड सीईटी परीक्षा 2025-26 साठी नोंदणी प्रक्रिया सुरू 

एज्युवार्ता न्यूज नेटवर्क 

पदवीचे शिक्षण घेऊन बीएड करू इच्छिणाऱ्या विद्यार्थ्यांसाठी आनंदाची बातमी आहे. महाराष्ट्र राज्य सामाईक परीक्षा (Maharashtra State Common Examination) कक्षातर्फे शैक्षणिक वर्ष 2025-26 (Academic year 2025-26) करिता घेण्यात येणार्‍या बीएड सीईटी परीक्षेसाठी (BEd CET Exam) ऑनलाईन पद्धतीने अर्ज नोंदणी प्रक्रिया सुरू करण्यात आली आहे. त्यासाठी विद्यार्थ्यांनी सीईटी सेलचे अधिकृत संकेतस्थळ https://cetcell.mahacet.org/ ला भेट द्यावी लागेल. अर्ज नोंदणी करण्याची अंतिम मुदत २८ जानेवारीपर्यंत असणार आहे. 

सीईटी-सेल च्या माध्यमातून व्यावसायिक अभ्यासक्रमांची प्रवेश प्रक्रिया राबविली जाते. त्यात बीएड अभ्यासक्रमाचा ही समावेश आहे. बीएड प्रवेशासाठी अर्ज करणारा विद्यार्थ्यी पदवी किंवा पदव्युत्तर उत्तीर्ण असणे आवश्यक आहे. सर्वसाधारण उमेदवारांना १ हजार रुपये अर्ज शुल्क भरावा लागणार आहे. तर इतर सर्व संवर्गातील उमेदवारांना ८०० रुपये अर्ज शुल्क भरवा लागेल. उमेदवाराने एकदा भरलेला अर्ज शुल्क कोणत्याही कारणास्तव परत मिळणार नसल्याचे स्पष्ट करण्यात आले आहे.

अर्ज भरण्यापूर्वी उमेदवाराने संकेतस्थळावर उपलब्ध असलेली संपूर्ण माहिती पुस्तिका वाचावी. बीएड प्रवेश परीक्षा नोंदणीसाठी अर्ज करणाऱ्या उमेदवाराकडे स्वतःचा मोबाईल व ईमेल आयडी असणे बंधनकारक असणार आहे. मोबाईल आणि ई मेल वर उमेदवाराला वेळोवेळी संदेश स्वरूपात माहिती पुरविली जाते. सीईटी सेलने दिलेल्या अधिकृत माहितीनुसार २४, २५ आणि २६ मार्च रोजी बीएड प्रवेशासाठी परीक्षा घेतली जाईल.