रेल्वे बोर्डाने घेतला मनसेचा धसका, इशारा दिल्याबरोबर रेल्वे भरतीची वादग्रस्त जाहिरात रद्द...

एज्युवार्ता न्यूज नेटवर्क 

भारतीय रेल्वे बोर्डाने (Railway Board) महाराष्ट्र नवनिर्माण सेनेचा (Maharashtra Navnirman Sena) चांगलाच धसका घेतल्याचे दिसत आहे. मध्य रेल्वेने १६ मार्च २०२६ रोजी प्रसिद्ध केलेली भरतीची अधिसूचना अखेर रद्द केली आहे. या अधिसूचनेत परीक्षेसाठी मराठी भाषेचा पर्याय डावलून केवळ हिंदी आणि इंग्रजी भाषेची सक्ती करण्यात आली होती. या परीक्षेत मराठी भाषेची (Marathi Language) होणारी गळचेपी लक्षात येताच मनसे नेते अमित ठाकरे (MNS Leader Amit Thackeray) यांना आक्रमक पवित्रा घेत रेल्वे बोर्डाला पत्र लिहून महाराष्ट्राच्या मातीत मराठीचा अपमान अजिबात खपवून घेणार नाही, असा दम भरला आणि काही तासांतच रेल्वे भरतीची अधिसूचना रद्द (Railway Recruitment Notification Cancelled) करण्याची घोषणा करण्यात आली. 

ऑगस्ट २०२५ मध्ये रेल्वे मंत्र्यांनी लोकसभेत आश्वासन दिले होते की परीक्षा १५ प्रादेशिक भाषांत होतील. मग केंद्राचा हा आदेश स्थानिक अधिकारी कचऱ्याच्या टोपलीत टाकत आहेत का? विभागीय पदोन्नतीसाठी विभागीय परीक्षेत मराठीची 'एलर्जी' का? मराठी माणसाची प्रगती होऊ नये, अशी नेमकी कोणाची इच्छा आहे? महाराष्ट्राच्या जमिनीवर नोकरी करायची आणि नोकरी देताना मात्र मराठीचा विचार करायचा नाही, ही कसली दडपशाही? त्वरीत या अधिसूचनेत बदल करून 'मराठी' भाषेचा सन्मानाने समावेश करा. अन्यथा, या अपमानाचा जाब विचारायला आणि मराठी कामगारांच्या हक्कासाठी 'महाराष्ट्र नवनिर्माण सेना' मैदानात उतरेल, असा स्पष्ट इशारा मनसेकडून देण्यात आला होता. त्यानंतर अवघ्या काही तासांमध्येच रेल्वेला आपला निर्णय मागे घ्यावा लागला आणि भरती प्रक्रिया रद्द करण्याची घोषणा केली.  

मध्य रेल्वेने वेगवेगळ्या पदांच्या भरतीसाठी १६ मार्च २०२६ रोजी प्रसिद्ध केलेल्या जाहिरातीत संगणक आधारित परीक्षेसाठी (CBT) मराठी भाषेचा समावेश नव्हता. रेल्वे बोर्डाने २३ मार्च २०२६ रोजी परीक्षेचा पॅटर्न आणि अभ्यासक्रमाबाबत नवीन स्पष्टीकरण जारी केले आहे. जुनी जाहिरात ही जुन्या सूचनांवर आधारित असल्याने ती रद्द करून आता लवकरच नवीन अधिसूचना काढली जाणार असल्याचे रेल्वेने स्पष्ट केले आहे. जाहिरात रद्द झाली असली तरी, आता येणाऱ्या नवीन अधिसूचनेत मराठी भाषेचा समावेश असणार का?, याकडे सर्वांचे लक्ष लागले आहे.