NEP नुसार चौथ्या वर्षांच्या ऑनर्स पदवी,ऑनर्स विथ रिसर्च पदवीचा निर्णय केव्हा?अधिसभेत बाळासाहेब सागडे यांचा स्थगन प्रस्ताव
शैक्षणिक वर्ष 26 -27 पासून सर्व स्वायत्त महाविद्यालयात पदवीचे चौथे वर्ष सुरू होणार आहे. चौथ्या वर्षाची ऑनर्स पदवी , ऑनर्स विथ रिसर्च पदवी उपलब्ध करून देणे अपेक्षित आहे. त्यामुळे विद्यापीठाने पदव्युत्तर पदवी व ऑनर्स पदवी प्रवेश द्यावयाच्या विषयांची प्रवेश क्षमता अजून निश्चित केलेली नाही.
eduvarta@gmail.com 
एज्युवार्ता न्यूज नेटवर्क
नवीन शैलक्षणिक धोरणाची अंमलबजावणी सुरू होऊन तीन वर्ष पूर्ण झाले असून चौथ्या वर्षाला सुरूवात झाली आहे. मात्र, अद्याप चौथ्या वर्षांच्या ऑनर्स पदवी , ऑनर्स विथ रिसर्च पदवी बाबत विद्यापीठाकडून स्वायत्त महाविद्यालयांना कोणतेही मार्गदर्शन करण्यात आलेले नाही. त्यामुळे सावित्रीबाई फुले पुणे विद्यापीठाच्या अधिसभेत अहिल्यानगर येथील न्यू आर्ट्स कॉलेजचे प्राचार्य व अधिसभा सदस्य डॉ. बाळासाहेब सांगडे यांनी विद्यापीठाच्या अधिसभेत या संदर्भात स्थगन प्रस्ताव मांडला.तसेच याबाबत नवीन विषयांना मान्यता देण्यात यावी,अशी मागणी केली. त्यावर शासनाकडून या संदर्भात परिपत्रक येणार असून त्यानुसार विद्यापीठाकडून मार्गदर्शक सूचना प्रसिद्ध केल्या जातील,असे विद्यापीठाचे प्र- कुलगुरू डॉ. पराग काळकर यांनी सांगितले.
विद्यापीठाच्या अधिसभेत शुक्रवारी स्वायत्त महाविद्यालयांच्या चार वर्षे पदवी अभ्यासक्रमाबाबत डॉ.बाळासाहेब सागडे यांनी स्थगन प्रस्ताव मांडला. त्यावर सविस्तर चर्चा करण्यात आली. राज्यातील सर्व स्वायत्त महाविद्यालयात राष्ट्रीय शैक्षणिक धोरणाची अंमलबजावणी शैक्षणिक वर्ष 23- 24 पासून पदवी स्तरावर सुरू झाली आहे. शैक्षणिक वर्ष 26 -27 पासून सर्व स्वायत्त महाविद्यालयात पदवीचे चौथे वर्ष सुरू होणार आहे. चौथ्या वर्षाची ऑनर्स पदवी , ऑनर्स विथ रिसर्च पदवी उपलब्ध करून देणे अपेक्षित आहे. त्यामुळे विद्यापीठाने पदव्युत्तर पदवी व ऑनर्स पदवी प्रवेश द्यावयाच्या विषयांची प्रवेश क्षमता अजून निश्चित केलेली नाही. तसेच त्यासाठी पात्रता काय असेल? याबाबतही अजूनही निर्णायक भूमिका घेण्यात आलेली नाही ,असे सांगडे यांनी सांगितले.
ऑनर्स पदवी व ऑनर्स विथ रिसर्च पदवीची प्रवेश फी किती असेल हेही निश्चित केलेले नाही, पदवी स्तरावर दुय्यम विषय मायनर सब्जेक्ट म्हणून शिकलेल्या विषयात विद्यार्थ्यांना पदव्युत्तर पदवी प्राप्त करण्यासाठी पात्रता पद्धती काय असेल? याबाबतही निर्णय झालेला नाही. फक्त पदवीपर्यंत शिक्षण उपलब्ध असेल, परंतु त्याच विषयाची पदव्युत्तर सुरू करायचे असेल तर त्याबाबतीत पुढे काय केले जाईल हेही अजून निश्चित झालेले नाही. त्यामुळे यावर अधिसभेत डॉ. बाळासाहेब सागडे यांनी वादळी चर्चा घडवून आणली.
विद्यापीठाने राष्ट्रीय शैक्षणिक धोरणातल्या सर्व विषयांना मान्यता द्याव्या. तसेच शिक्षकांचा कार्यभार राष्ट्रीय शैक्षणिक धोरणाप्रमाणे जे जे विषय पदवी व पदव्युत्तर साठी नवीन आलेले आहेत त्या सर्व विषयाचा कार्यभार धरण्यात यावा, यासाठी त्या सर्व विषयांना विद्यापीठाने पहिल्यांदा मान्यता द्याव्यात,अशी मागणी सागडे यांनी केली.दरम्यान, प्रा.रमेश गायकवाड, प्रा.सुनील लोखंडे, प्रा.शांताराम निगडे यांनी या प्रस्तावावरील चर्चात सहभागात घेतला.
