मास कम्युनिकेशन आणि पत्रकारिता या विषयात पीएचडी सुरू होणार

एज्युवार्ता न्यूज नेटवर्क

इंडियन इन्स्टिट्यूट ऑफ मास कम्युनिकेशन (Indian Institute of Mass Communication) येत्या शैक्षणिक वर्षापासून मास कम्युनिकेशन आणि जर्नलिझममध्ये पीएचडी (PhD in Mass Communication and Journalism) सुरू करणार आहे. “आम्ही पीएचडी कार्यक्रमाचे नियम अधिसूचित केले आहेत आणि येत्या शैक्षणिक वर्षापासून हा कार्यक्रम सुरू करण्याचा आमचा मानस आहे. ही एक मोठी जबाबदारी आहे आणि आम्ही त्यासाठी तयार आहोत,” असे आयआयएमसीच्या कुलगुरू अनुपमा भटनागर (IIMC Vice Chancellor Anupama Bhatnagar) यांनी सांगितले आहे.

“आयआयएमसीला मीडिया, पत्रकारिता आणि कम्युनिकेशन क्षेत्रात संशोधनात आघाडीवर राहायचे आहे. या क्षेत्रात वैज्ञानिक अभ्यासाला चालना देण्याची गरज आहे आणि आम्ही यामध्ये भूमिका बजावण्यास उत्सुक आणि आनंदी आहोत,” असे आयआयएमसीचे कुलसचिव निमिश रुस्तगी यांनी म्हटलं आहे.प्रवेश प्रक्रियेची माहिती योग्य वेळी जाहीर केली जाईल असेही रुस्तगी म्हणाले.

१९६५ मध्ये स्थापन झालेल्या आयआयएमसीने आपल्या शैक्षणिक उपक्रमांचा विस्तार केला आहे आणि आता वेगाने विस्तारणाऱ्या मीडिया आणि कम्युनिकेशन उद्योगाच्या कुशल मनुष्यबळाच्या गरजा पूर्ण करण्यासाठी विविध विशेष अभ्यासक्रम याठिकाणी चालवण्यात येत आहेत.

दरम्यान, आयआयएमसीचे रजिस्ट्रार निमिश रुस्तगी म्हणाले की, संस्थेने नवीन कार्यक्रम सुरू केले आहेत, तसेच संस्थेने त्यांच्या सुविधांचे आधुनिकीकरण केले आहे आणि माध्यम शिक्षण आणि प्रशिक्षणात महत्त्वपूर्ण टप्पे गाठले आहेत.

त्यांनी पुढे सांगितले की, 'डीम्ड टू बी युनिव्हर्सिटी' म्हणून घोषित झालेल्या या संस्थेने ऑगस्टमध्ये ८० विद्यार्थ्यांसह मीडिया बिझनेस स्टडीज आणि स्ट्रॅटेजिक कम्युनिकेशन हे दोन एमए प्रोग्राम सुरू केले आहे.