तरुणांना सक्षम करण्यासाठी बार्टी आणि एमसीईडी यांच्याकडून उद्योजकता प्रशिक्षण कार्यक्रमांचे आयोजन
अनुसूचित जाती प्रवर्गातील युवक-युवतींना तांत्रिकदृष्ट्या सक्षम करून स्वयंरोजगाराच्या प्रवाहात आणण्यासाठी डॉ. बाबासाहेब आंबेडकर संशोधन व प्रशिक्षण संस्था व महाराष्ट्र उद्योजकता विकास केंद्र यांच्या संयुक्त विद्यमाने राज्यात ९८ तांत्रिक उद्योजकता विकास प्रशिक्षण कार्यक्रमांचे आयोजन करण्यात आले आहे.
eduvarta@gmail.com 
एज्युवार्ता न्यूज नेटवर्क
अनुसूचित जाती प्रवर्गातील युवक-युवतींना तांत्रिकदृष्ट्या सक्षम (Technically competent youth) करून स्वयंरोजगाराच्या प्रवाहात आणण्यासाठी डॉ. बाबासाहेब आंबेडकर संशोधन व प्रशिक्षण संस्था (Barty) व महाराष्ट्र उद्योजकता विकास केंद्र (MCED) यांच्या संयुक्त विद्यमाने राज्यात ९८ तांत्रिक उद्योजकता विकास प्रशिक्षण कार्यक्रमांचे आयोजन (Organizing training programs) करण्यात आले आहे. सविस्तर आणि तपशीलवार माहितीसाठी www.mced.co.in/Barti या संकेतस्थळावर नोंदणीचे आवाहन (Call for registration) उद्योजकता विकास केंद्राकडून करण्यात आले आहे.
नागपूर, अमरावती, छत्रपती संभाजीनगर, नाशिक, मुंबई, पुणे व लातूर या प्रत्येक विभागात एक महिन्याचे व दोन महिन्यांचे अनिवासी तांत्रिक उद्योजकता विकास प्रशिक्षण कार्यक्रम राबविण्यात येणार आहेत. या प्रशिक्षणाचा मुख्य उद्देश अनुसूचित जाती प्रवर्गातील युवक-युवतींनी तंत्रशुद्ध प्रशिक्षण घेऊन स्वतःचा उद्योग सुरु करावा किंवा कौशल्याच्या आधारे रोजगार प्राप्त असल्याचे म्हटले आहे. प्रशिक्षणादरम्यान संबंधित विषयांचे प्रात्यक्षिकासह तांत्रिक ज्ञान दिले जाणार आहे.
नागपूर विभागात नागपूर, उपकेंद्र हिंगणा, भंडारा, गोंदिया, वर्धा, गडचिरोली व चंद्रपूर या जिल्ह्यांमध्ये एक महिन्याचे व दोन महिन्याचे, असे एकूण १४ प्रशिक्षण कार्यक्रम आयोजित करण्यात आले आहेत.
प्रशिक्षणा दरम्यान उमेदवारांना उद्योग उभारणी प्रक्रिया, शासकीय कर्ज व अनुदान योजना, प्रकल्प अहवाल तयार करणे, विक्री कौशल्य, उद्योग व्यवस्थापन, उद्योग भेटी, कर कायदे व परवाने आदी विषयांवर तज्ज्ञा मार्गदर्शकांकडून मार्गदर्शन केले जाणार आहे. प्रशिक्षणासाठी अर्जदाराने अभियांत्रिकी, पॉलिटेक्निक, एमसीए बीसीए, एमएस्सी, बीएस्सी इत्यादी शिक्षण घेतलेले असावे.
