SPPU : सेंट्रल सेक्टर शिष्यवृत्ती योजनेसाठी ऑनलाईन अर्जाला सुरुवात
राज्यातील उच्च माध्यमिक (इयत्ता १२ वी) प्रमाणपत्र परीक्षेमध्ये कला, वाणिज्य व विज्ञान तसेच व्यावसायिक या विद्याशाखांमधील उच्चतम गुणवत्ताप्राप्त विद्यार्थ्यांसाठी पुढील पदवी व पदव्युत्तर शिक्षणासाठी भारत सरकारची १०० टक्के केंद्र शासन पुरस्कृत "सेंट्रल सेक्टर शिष्यवृत्ती योजना" सन २०२५-२६ च्या नवीन शिष्यवृत्ती व नुतनीकरणाचे फॉर्म ऑनलाईन पध्दतीने ३१ ऑक्टोबर २०२५ पर्यंत www.scholarships.gov.in या संकेतस्थळावर सादर करा.
eduvarta@gmail.com 
एज्युवार्ता न्यूज नेटवर्क
शिक्षण संचालनालयाने (Directorate of Education) सन २०२५-२६ साठी विद्यार्थ्यांना सेंट्रल सेक्टर शिष्यवृत्तीची (Central Sector Scholarship) अंमलबजावणी करण्यासंदर्भात विद्यापीठ आणि महाविद्यालयांना पत्र पाठवले. त्यानंतर आता विद्यापीठ स्तरावर या शिष्यवृत्ती प्रक्रियेला वेग आल्याचे पाहायला मिळत आहे. सावित्रीबाई फुले पुणे विद्यापीठाने (Savitribai Phule Pune University) विद्यार्थ्यांना ऑनलाइन अर्ज करण्याचे आवाहन परिपत्रकाद्वारे केले आहे. केंद्रशासन पुरस्कृत महाविद्यालय व विद्यापीठामधील विद्यार्थ्यांना या शिष्यवृत्तीचा (Student Scholarships) फायदा घेता घेणार असल्याचे स्पष्ट करण्यात आले आहे.
राज्यातील उच्च माध्यमिक (इयत्ता १२ वी) प्रमाणपत्र परीक्षेमध्ये कला, वाणिज्य व विज्ञान तसेच व्यावसायिक या विद्याशाखांमधील उच्चतम गुणवत्ताप्राप्त विद्यार्थ्यांसाठी पुढील पदवी व पदव्युत्तर शिक्षणासाठी भारत सरकारची १०० टक्के केंद्र शासन पुरस्कृत "सेंट्रल सेक्टर शिष्यवृत्ती योजना" सन २०२५-२६ च्या नवीन शिष्यवृत्ती व नुतनीकरणाचे फॉर्म ऑनलाईन पध्दतीने ३१ ऑक्टोबर २०२५ पर्यंत www.scholarships.gov.in या संकेतस्थळावर सादर करा.
शिष्यवृत्तीसाठी पात्र असलेल्या विद्यार्थ्यांनी संकेतस्थळावर दिलेल्या सूचनेनुसार युजर आयडी तयार करून ऑनलाईन पध्दतीने अर्ज सादर करावेत. अर्ज करण्यासाठीच्या सर्व आवश्यक सूचना, तसेच शिष्यवृत्तीसाठीच्या पात्रतेचे नियम व अटी संकेतस्थळावर उपलब्ध आहेत. शिष्यवृत्ती बाबतच्या संकेतस्थळावरील मार्गदर्शक सुचना वाचून त्यानुसार सर्व विद्यार्थी व महाविद्यालयांनी कार्यवाही करणे आवश्यक आहे. तसेच सदर योजनेबाबतच्या केंद्रशासनाकडील नवीन / सुधारीत प्राप्त सुचनांसाठी संचालनालयाच्या www.dhepune.gov.in या संकेतस्थळाला वेळोवेळी महाविद्यालयांनी व विद्यार्थ्यांनी भेट द्यावी.
अर्जासाठी पात्रता व अटी
अर्जदार भारतीय नागरीक व महाराष्ट्र राज्याचा रहिवासी असावा. अर्जदार इतर कोणत्याही शिष्यवृत्तीचा / स्टायपेंडचा लाभार्थी नसावा. अर्जदारच्या पालकाचे वार्षिक उत्पन्न रू ४.५ लाखांपेक्षा अधिक नसावे. सदर शिष्यवृत्ती पदवी व पदव्युत्तर व्यावसायिक तसेच बिगर व्यावसायिक अभ्यासक्रमासाठी प्रवेश घेतलेल्या विद्यार्थ्यांसाठी आहे. सदर शिष्यवृत्ती योजना कोणताही Diploma, Correspondence Course & Distance Education साठी लागू नाही. केंद्रशासानाच्या नियमानुसार, अभियांत्रिकी अभ्यासक्रमांसाठी व वैद्यकीय अभ्यासक्रमासाठी प्रवेश घेतलेल्या विद्यार्थ्यांना ४ वर्षे व कला, वाणिज्य व विज्ञान अभ्यासक्रमांसाठी प्रवेश घेतलेल्या विद्यार्थ्यांना ५ वर्षापर्यंत सदर शिष्यवृत्ती देय राहील.
