पीआरएन ब्लॉक विद्यार्थ्यांचा निर्णय घेण्यास 25 नोव्हेंबर उजाडणार

एज्युवार्ता न्यूज नेटवर्क

सावित्रीबाई फुले पुणे विद्यापीठाशी (Savitribai Phule Pune University)संलग्न महाविद्यालयातील सुमारे 1 लाख विद्यार्थ्यांची सत्र पूर्तता संपल्यामुळे या विद्यार्थ्यांचे पीआरएन क्रमांक ब्लॉक (PRN block)करून ठेवण्यात आले आहेत.मात्र, या विद्यार्थ्यांना पुन्हा एकदा परीक्षा देण्याची एक संधी द्यावी,असा निर्णय विद्यापीठाच्या विद्यापरिषद व व्यवस्थापन परिषदेत झाला.परंतु, त्यास पंधरा दिवसांहून अधिक कालावधी उलटून गेला तरी अद्याप त्यावर विद्यापीठाच्या परीक्षा विभागाने या विद्यार्थ्यांच्या परीक्षेच्या नियमावली संदर्भात अंतिम परिपत्रक प्रसिद्ध केले नाही.परीक्षा विभागाला त्यासाठी आणखी एक आठवडा लागणार आहे. परिणामी पीआरएन ब्लॉक विद्यार्थ्यांचा 25 नोव्हेंबरपर्यंत वाट पहावी लागणार आहे.

विद्यापीठाच्या परीक्षा विभागाने काही दिवसांपूर्वी परिपत्रक प्रसिद्ध केले होते.सावित्रीबाई फुले पुणे विद्यापीठाच्या अधिकार मंडळांकडून ज्या विद्यार्थ्यांची सत्रपूर्तता (N+2) संपुष्टात आली आहे किंवा कायम नोंदणी क्रमांक (PRN) कालावधी संपुष्टात आला आहे, अशा सर्व विद्यार्थ्यांना सध्या सुरू असलेला NON-NEP पॅटर्न अभ्यासक्रम पूर्ण करून परीक्षेस प्रविष्ट होण्यासाठी अधिकचे एक वर्ष (N+2+1) देण्याचा निर्णय घेण्यात आला आहे. तसेच काही अभ्यासक्रमातील N+2 आणि N+2+1 व्यतिरिक्त अधिकचा सत्रपूर्तता कालावधी असलेल्या विद्यार्थ्यांनाही सध्या सुरू असलेल्या NON-NEP पॅटर्नमध्ये अभ्यासक्रमाच्या अंतिम वर्षास प्रवेशित/प्रविष्ट होऊन असे NON-NEP अभ्यासक्रम पूर्ण करण्यास मान्यता देण्यात आली आहे. त्या अनुषंगाने सर्व विद्याशाखा, सर्व अभ्यासक्रमांतील उपरोक्ल्लेखित कालावधी संपुष्टात आलेल्या अशा विद्यार्थ्यांची माहिती (डेटा) विद्यापीठाच्या डेटाबेसमधून वर्गीकृत करण्याचे काम सुरू आहे. तसेच त्यासाठी कार्यप्रणाली निश्चित करण्याचे काम सुरू आहे.

विद्यापीठाने घेतलेल्या या निर्णयाअंतर्गत समाविष्ट सर्व विद्यार्थ्यांचे परीक्षा अर्ज स्वतंत्रपणे सुरू करण्यात येणार आहेत. त्यामुळे याबाबत विद्यार्थ्यांनी साशंक अथवा भयभीत होऊ नये. या अंतर्गत पात्र विद्यार्थ्यांची शैक्षणिक वर्ष २०२५-२६ मधील सत्रपूर्तता, शेवटचे वर्ष त्यांच्या मूळ महाविद्यालयातून पूर्ण करण्याची आवश्यकता, विविध अभ्यासक्रमात वेळोवेळी समाविष्ट झालेला मूळ कालावधी या सर्वांची छाननीही होणार आहे. या बाबतची प्रणालीही तयार करण्याचे काम सुरू आहे. सत्रपूर्तता किंवा PRN संदर्भातील सर्व माहिती ही केवळ विद्यापीठाकडे असलेल्या स्वतःच्या डेटाबेसमधूनच घेतली जाणार असून यासाठी विद्यापीठाने कोणत्याही व्यक्तीला, व्यक्तीसमूहांना नियुक्त केले नाही, याचीही विद्यार्थ्यांनी नोंद घ्यावी,तसेच पीआरएन ब्लॉक विद्यार्थ्यांच्या परीक्षेसंदर्भातील कार्यप्रणाली स्पष्ट करणारे परिपत्रकही यथावकाश जाहीर केली जाणार आहे,असे विद्यापीठाचे प्रभारी परीक्षा व मूल्यमापन संचालक डॉ. प्रभाकर देसाई यांनी परिपत्रकाद्वारे प्रसिध्द केले होते.

विद्यापीठाने याबाबत परिपत्रक प्रसिध्द केले असले तरी यथावकाश म्हणजे किती दिवस या संदर्भातील प्रश्नाचे उत्तर विद्यार्थ्यांना मिळाले नाही. त्यामुळे गेल्या काही दिवसांपासून विद्यार्थी परीक्षा विभागात गर्दी करत आहेत. तसेच महाविद्यालयात प्राध्यापक व प्राचार्य यांच्याकडे विचारना करत आहेत. मात्र, त्याबाबत कोणतेही ठोस उत्तर मिळत नाही.परंतु, परीक्षा विभागातील वरिष्ठ अधिकाऱ्यांनी दिलेल्या माहितीनुसार पीआरएन ब्लॉक झालेल्या विद्यार्थ्यांच्या परीक्षेसंदर्भातील सविस्तर परिपत्रक जाहीर करण्यास 25 नोव्हेंबर उजाडणार आहे.त्यामुळे विद्यार्थ्यांना आता 25 नोव्हेंबरपर्यंत वाट पहावी लागणार आहे.