पूर्वपरवानगीशिवाय आंदोलन करता येणार नाही; मुंबई विद्यापीठाचा निर्णय

एज्युवार्ता न्यूज नेटवर्क 

विद्यार्थी हिताचा विचार न करता घेतले जाणारे निर्णय आणि त्याविरोधात विद्यार्थ्यांकडून (Students) पुकारले जाणारे आंदोलन यामुळे मागील काही महिन्यांपासून सतत चर्चेत असलेल्या मुंबई विद्यापीठाने (Mumbai university) आता आणखी एक फतवा काढत नवीन वादाला तोंड फोडले आहे. 

यापुढे आता मुंबई विद्यापीठाच्या परिसरात संघटनांना किंवा व्यक्तीस कोणत्याही स्वरुपाच्या सभा, आंदोलने, मोर्चा, उपोषण, निषेध मोर्चा, बैठका व तत्सम कोणत्याही कार्यक्रमाचे पूर्वपरवानगीशिवाय आयोजन करता येणार नाही (Organizations or individuals shall not organize any form of meetings, agitations, marches, hunger strikes, protest marches, meetings and similar events in the premises of the University of Mumbai without prior permission) असे पत्रक (Circular) विद्यापीठ प्रशासनाने काढले आहे.

नुकत्याच झालेल्या मुंबई विद्यापीठाच्या व्यवस्थापन परिषदेच्या बैठकीत या ठरावाला मंजुरी देण्यात आली. मुंबई विद्यापीठ प्रशासनाने या संदर्भातील परिपत्रक जारी केल्यानंतर त्याचा विद्यार्थी संघटनांनी तीव्र निषेध केला आहे. हे परिपत्रक तात्काळ मागे घेण्याची मागणी संघटना करत आहेत. 

'मुंबई विद्यापीठाच्या अंतर्गत असलेल्या परिसरात सुरक्षेच्या दृष्टीकोनातून व कोणताही अनुचित प्रकार घडू नये, यासाठी आंदोलनास पूर्वपरवानगी घेण्याचा निर्णय घेण्यात आला आहे. या निर्णयाच्या अनुषंगाने कोणत्याही संघटनेस किंवा व्यक्तीस कोणत्याही स्वरुपाच्या सभा, आंदोलने, मोर्चा, उपोषण, निषेध मोर्चा, बैठका व तत्सम कोणताही कार्यक्रम आयोजित करण्यासाठी मुंबई विद्यापीठ प्रशासनाची पूर्वपरवानगी घेणे आवश्यक आहे, असे मुंबई विद्यापीठ प्रशासनाने परिपत्रकात स्पष्ट केले आहे. 

या परिपत्रकानुसार, मुंबई विद्यापीठ फोर्ट संकुल, सांताक्रुझमधील कलिना संकुल, ठाणे उपपरिसर, कल्याणमधील स्कूल ऑफ इंजिनीअरिग ॲण्ड अप्लाईड सायन्सेस, रत्नागिरी उपपरिसर व तळेरे येथील विजयालक्ष्मी विश्वनाथ दळवी आदर्श महाविद्यालय आणि मंडणगड येथील डॉ. बाबासाहेब आंबेडकर आदर्श महाविद्यालयातील विद्यापीठाच्या अंतर्गत असलेल्या परिसरात आंदोलन व कोणताही कार्यक्रम पूर्वपरवानगीशिवाय आयोजित करता येणार नाही.