महाराष्ट्र : उच्च शिक्षण विभागातील २ शिक्षकांना राष्ट्रीय पुरस्कार जाहीर

एज्युवार्ता न्यूज नेटवर्क

भारत सरकारच्या शिक्षण मंत्रालयाने राष्ट्रीय शिक्षक पुरस्कार 2025 (National Teacher Award 2025) जाहीर केले असून, यामध्ये महाराष्ट्रातील एकूण ४ शिक्षकांनी आपल्या उत्कृष्ट योगदानामुळे हा प्रतिष्ठित सन्मान प्राप्त केला आहे. यामध्ये शालेय शिक्षण विभागातील दोन तर उच्च शिक्षण विभागातील दोन अशा एकूण चार शिक्षकांचा समावेश आहे. शालेय शिक्षण विभागात डॉ. शेख मोहम्मद वकुओद्दीन शेख हमीदोद्दीन आणि डॉ. संदीपान गुरुनाथ जगदाळे तर उच्च शिक्षण विभागात (Department of Higher Education) प्रा. पुरुषोत्तम पवार आणि डॉ. नीलाक्षी जैन (Prof. Purushottam Pawar and Dr. Neelakshi Jain) या महिला शिक्षिकेचा समावेश आहे. या सर्वांना 5 सप्टेंबर 2025 रोजी शिक्षक दिनानिमित्त हा राष्ट्रीय पुरस्कार प्रदान करण्यात येणार आहे. 

CET Cell 2025 : BAMS, BHMS, BUMS प्रवेशाचे वेळापत्रक जाहीर

शिक्षण मंत्रालयाच्या उच्च शिक्षण विभागाने देशभरातील 27 राज्ये, 7 केंद्रशासित प्रदेशातून 21 शिक्षकांची निवड केली आहे. यामध्ये महाराष्ट्रातील मुंबईतील शाह अँन्ड अँकर कच्छी अभियांत्रिकी महाविद्यालयातील डॉ. नीलाक्षी जैन आणि बारामती येथील एस व्ही पी एम इन्स्टिट्यूट ऑफ टेक्नॉलॉजी अँड इंजिनिअरिंग महाविद्यालयातील प्रा. पुरुषोत्तम पवार यांचा समावेश आहे. राष्ट्रीय शैक्षणिक धोरण 2020 नुसार, उच्च शिक्षणातील प्रेरक आणि सक्षम प्राध्यापकांना प्रोत्साहन देण्यासाठी 2023 मध्ये या पुरस्काराची सुरुवात झाली. निवड प्रक्रियेत अध्यापन परिणामकारकता, समाजाभिमुख उपक्रम, संशोधन, नवोन्मेष आणि प्रायोजित संशोधन यासारख्या निकषांवर मूल्यमापन करण्यात आले. डॉ. जैन आणि प्रा. पवार यांनी आपल्या उत्कृष्ट अध्यापन आणि सामाजिक योगदानामुळे हा पुरस्कार प्राप्त केला आहे.

उच्च शिक्षण आणि साक्षरता विभागाने २१ शिक्षकांची निवड राष्ट्रीय शिक्षक पुरस्कार 2025 साठी केली आहे. या दोन्ही शिक्षकांनी नाविन्यपूर्ण अध्यापन पद्धती आणि विद्यार्थ्यांच्या सर्वांगीण विकासासाठी केलेल्या समर्पित कार्यामुळे हा पुरस्कार मिळवला आहे. निवड प्रक्रिया पारदर्शी आणि कठोर स्वरूपाची असून, ती जिल्हा, राज्य आणि राष्ट्रीय अशा तीन स्तरांवर 23 जून ते 20 जुलै 2025 या कालावधीत ऑनलाइन पद्धतीने पार पडली.