धक्कादायक : विद्यापीठाच्या वसतीगृहात दुसऱ्यांदा सापडला गांजा?

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या वसतिगृहात (Savitribai Phule Pune University Hostel) पुन्हा एकदा गांजा सापडल्याची धक्कादायक माहिती(Information on the discovery of marijuana)समोर आली आहे. विद्यापीठातील स्किल डेव्हलपमेंट विभागाचे विद्यार्थी (Students of Skill Development Department) वस्तीगृहात अमली पदार्थाचे सेवन करत असल्याची तक्रार एका विद्यार्थ्याने विद्यापीठाच्या सुरक्षा विभागाकडे केली होती. त्यानंतर संबंधित विद्यार्थ्यांना सुरक्षा विभागाच्या कर्मचाऱ्यांनी पोलिसांच्या ताब्यात दिले आहे,असे विश्वसनीय सूत्रांनी सांगितले. 

सावित्रीबाई फुले पुणे विद्यापीठाच्या वसतिगृहात यापूर्वी सुद्धा गांजा सापडल्याची घटना समोर आली होती. परंतु, विद्यापीठ प्रशासनाने सापडलेला गांजा पोलिसांकडे न देता विद्यापीठाकडेच ठेवला होता. तसेच या प्रकरणाची चौकशी करण्यासाठी समिती स्थापन केली होती. त्यामुळे मोठा गदारोळ झाला होता. विविध विद्यार्थी संघटनांसह राजकीय संघटनांनी सुद्धा या घटनेच्या पार्श्वभूमीवर आंदोलन केले होते. त्यानंतर पुन्हा एकदा विद्यापीठाच्या वसतीगृहात गांजा सापडल्याची माहिती समोर आल्याने विद्यापीठ वर्तुळात मोठा गोंधळ उडाला आहे.

विद्यापीठाच्या वसतिगृह क्रमांक 5 मधील एका खोलीत विद्यार्थी गांजा ओढत असल्याची तक्रार विद्यापीठातील एका विद्यार्थ्याने बुधवारी दुपारी 4.30 वाजण्याच्या सुमारास सुरक्षा विभागाकडे केली. त्यावर सुरक्षा विभागातील कर्मचाऱ्यांनी प्रत्यक्ष जाऊन घटनेची पाहणी केली. विद्यार्थ्यांनी केलेल्या तक्रारीनुसार सुरक्षा विभागाने तक्रारदार विद्यार्थी व गांजा ओढत असलेल्या दोन विद्यार्थ्यांना पोलिसांच्या ताब्यात दिले, असेही सूत्रांनी सांगितले. 

विद्यापीठाच्या स्किल डेव्हलपमेंट विभागामध्ये प्रवेश घेणारे विद्यार्थी हे इयत्ता बारावी उत्तीर्ण असतात. गांजा ओढताना आढळून आलेल्या विद्यार्थ्यांना विद्यापीठातर्फे वसतिगृह देण्यात आलेले नाही, तरीसुद्धा संबंधित विद्यार्थी वसतिगृहात अनधिकृतपणे राहत असल्याचे विश्वसनीय सूत्रांकडून सांगितले जात आहे. त्यामुळे विद्यापीठाच्या सुरक्षा व्यवस्थेबाबत प्रश्नचिन्ह उपस्थित होत आहे. तसेच विद्यार्थी वसतीगृहात अनधिकृतपणे कसे राहत आहेत, याबद्दलही सवाल उपस्थित केले जात आहेत.याबाबत विद्यापीठाकडून अधिकृत माहिती जाणून घेण्यासाठी विद्यापीठाच्या प्रभारी कुलसचिव डॉ. ज्योती भाकरे यांच्याशी संपर्क साधण्याचा प्रयत्न केला असता संपर्क होऊ शकला नाही.