NEET पेपरफुटी दिल्लीनंतर आता पुण्यात जमा होणार 'कॉकरोच पुणे विद्यापीठाच्या प्रवेशद्वारावर ११ जूनला आंदोलन 

एज्युवार्ता न्यूज नेटवर्क 

केंद्रीय शिक्षणमंत्री धर्मेंद्र प्रधान (Dharmendra Pradhan) यांच्या राजीनाम्याची मागणी (Demand for resignation) करत 'कॉकरोच जनता पार्टी' (cJp) येत्या गुरुवारी ११ जून रोजी पुण्यात शांततापूर्ण आंदोलन (Protest in Pune on June 11) करणार आहे. पक्षाचे संस्थापक अभिजित दिपके यांच्या नेतृत्वाखाली हे आंदोलन सावित्रीबाई फुले पुणे विद्यापीठाच्या (Savitribai Phule Pune University) मुख्य प्रवेशद्वाराजवळ संध्याकाळी ४ वाजता होणार असल्याची माहिती पक्षाकडून देण्यात आली आहे. NEET परीक्षेतील कथित गैरप्रकार आणि इतर विविध परीक्षांमधील पेपरफुटीच्या मुद्द्यावरून विद्यार्थी आणि पालकांमध्ये प्रचंड संताप आहे. याच पार्श्वभूमीवर CJP ने केंद्र सरकारवर दबाव वाढवण्यासाठी हे आंदोलन आयोजित केले आहे. 

पार्टीचे प्रमुख अभिजीतने स्पष्ट केले आहे की, हे आंदोलन पूर्णपणे शांततापूर्ण असेल आणि कोणत्याही प्रकारचे हिंसक कृत्य किंवा नियमबाह्य वर्तन केले जाणार नाही.'कॉकरोच जनता पार्टी'ने विद्यापीठ प्रशासन आणि पुणे पोलिसांना याबाबतचे निवेदन दिले असून, परवानगीसाठी प्रयत्न सुरू आहेत. मात्र, सध्या पुणे शहरात वाढत्या गुन्हेगारी आणि संवेदनशील घटनांच्या पार्श्वभूमीवर पोलिस आयुक्त अमितेशकुमार यांनी जमावबंदीचे (Section 144) आदेश लागू केले आहेत. त्यामुळे विद्यापीठासारख्या संवेदनशील ठिकाणी आंदोलनाला अधिकृत परवानगी मिळते का, याकडे सर्वांचे लक्ष लागले आहे. 

अभिजित दिपके म्हणाले, “विद्यार्थ्यांच्या भवितव्यशी खेळ खेळला जात आहे. NEET सारख्या परीक्षांमधील गैरव्यवहारामुळे लाखो विद्यार्थ्यांचे वर्ष वाया जात आहे. अनेक विद्यार्थ्यांनी आत्महत्या केली आहे. केंद्रीय शिक्षणमंत्र्यांनी या प्रकरणाची जबाबदारी स्वीकारून राजीनामा द्यावा, ही आमची मुख्य मागणी आहे. आम्ही शांततापूर्ण मार्गाने लोकमत जागृत करणार आहोत.” दिल्लीतील जंतर-मंतर येथील आंदोलनानंतर महाराष्ट्रातील हे CJP चे पहिलेच मोठे आंदोलन असल्याने विद्यार्थी संघटना, राजकीय पक्ष आणि शैक्षणिक वर्तुळात याकडे विशेष लक्ष आहे. पेपरफुटी प्रकरणात देशभरात विविध ठिकाणी आंदोलने सुरू असताना, पुण्यातील या आंदोलनामुळे NEET घोटाळ्याचा मुद्दा पुन्हा एकदा चर्चेत येण्याची शक्यता आहे.

विद्यापीठ प्रशासनाने अद्याप अधिकृत भूमिका स्पष्ट केलेली नाही. मात्र, कायदा आणि सुव्यवस्थेच्या दृष्टीने पोलिसांकडून योग्य ती खबरदारी घेतली जाईल, अशी माहिती समोर येत आहे. आंदोलनात मोठ्या संख्येने विद्यार्थी, पालक आणि सामाजिक कार्यकर्ते सहभागी होण्याची शक्यता वर्तवण्यात येत आहे. CJP ने या आंदोलनाद्वारे फक्त राजीनामा न मागता, परीक्षा पद्धतीत मूलभूत सुधारणा, पारदर्शकता आणि दोषींवर कठोर कारवाईचीही मागणी केली आहे. त्यामुळे ११ जूनच्या या आंदोलनाकडे सर्वांचे लक्ष लागले आहे.