BBA, BCA साठी पुन्हा CET घेण्याच्या मंत्री चंद्रकांत पाटील यांच्या सूचना

एज्युवार्ता न्यूज नेटवर्क

शैक्षणिक वर्ष २०२५-२६ साठी बीसीए, बीबीए (BBA,BCA Admission) या अभ्यासक्रमाचे प्रवेश पूर्ण होण्याच्या दृष्टीने पुन्हा सीईटी (CET Exam) घेण्याच्या सूचना उच्च व तंत्रशिक्षणमंत्री चंद्रकांत पाटील (Minister of Higher and Technical Education Chandrakant Patil) यांनी राज्याच्या उच्च व तंत्र शिक्षण संचालकांना दिल्या आहेत. बीबीए आणि बीसीए पदवी अभ्यासक्रमांच्या परीक्षांमध्ये निर्माण झालेल्या अडचणींच्या पार्श्वभूमीवर मंत्रालयात बैठक आयोजित करण्यात आली. यावेळी त्यांनी या सूचना दिल्या आहेत.  

बीबीए, बीसीए अभ्यासक्रमांच्या प्रवेश प्रक्रियेसाठी जाचक अटी ठेवल्याने या अभ्यासक्रमाकडे विद्यार्थ्यांचा ओढा कमी झाला आहे. याबाबत मंत्री चंद्रकांत पाटील, वैद्यकीय शिक्षण मंत्री हसन मुश्रीफ यांच्या उपस्थितीत मुंबईत शिवाजी विद्यापीठ विकास आघाडी व प्राचार्य संघटनेची बैठक झाली.

शैक्षणिक वर्षामध्ये अनेक विद्यार्थ्यांनी बीबीए, बीसीएसाठीची प्रवेश परीक्षा न दिल्यामुळे ते प्रवेशापासून वंचित राहण्याची शक्यता होती. हा मुद्दा विकास आघाडीने मंत्री पाटील यांच्यासमोर मांडला. त्यांनी पुनर्परीक्षा घेण्याच्या सूचना दिल्या. त्यामुळे या परीक्षेचे दोन दिवसांत नोटीफिकेशन निघणार आहे.

दरम्यान, बीसीए, बीबीए अभ्यासक्रमासंदर्भात येणाऱ्या अडचणींबाबत अखिल भारतीय तंत्र शिक्षण परिषदेकडे संलग्नीकरण शुल्क व अनामत रक्कम कमी करण्यासाठी शासनातर्फे शिफारस करण्यात येईल, अशी ग्वाहीही मंत्री पाटील यांनी यावेळी दिली. शिवाजी विद्यापीठ विकास आघाडीचे उपाध्यक्ष भय्या माने, प्राचार्य डी. आर. मोरे, अॅड. धैर्यशील पाटील, प्राचार्य डॉ. व्ही. एम. पाटील, उच्च शिक्षण सचिव वेणुगोपाल रेड्डी, संचालक शैलेंद्र देवळणकर, तंत्र शिक्षण संचालक विनोद मोहितकर, सहसंचालक प्रकाश बच्छाव यावेळी उपस्थित होते.