इस्त्रायल, अमेरिका बालहत्यारे! 168 शाळकरी मुलांचे फोटो, दप्तरे अन् बूटासह इराणचं शिष्टमंडळ पाकिस्तानात दाखल

एज्युवार्त न्यूज नेटवर्क 

इस्रायल आणि अमेरिकेला बालहत्यारे (Child Killers) म्हणून चित्रित करण्यासाठी, इराणने इस्लामाबादला जाणाऱ्या इराणी शिष्टमंडळाच्या विमानातील आसने तेहरानच्या मिनाब हल्ल्यात ठार झालेल्या 168 शाळकरी मुलांचे (168 Schoolchildren Killed in Minab Attack) फोटो, त्यांच्या शाळेच्या बॅगा आणि बूट यांनी सजवली. शांतता चर्चेपूर्वी इस्रायल आणि अमेरिकेच्या या कृत्याकडे जगाचे लक्ष वेधण्यासाठी इराणने हा एक निषेध म्हणून सादर केला. शनिवारी अमेरिका-इराण शांतता चर्चा (Peace Talks) सुरु होण्यापूर्वी, इराणचे संसद अध्यक्ष गालिबाफ (Iran's Parliament Speaker Ghalibaf) यांनी 'एक्स' या सोशल मीडिया प्लॅटफॉर्मवर आपल्या विमानातून एक फोटो शेअर करुन खळबळ उडवून दिली. या फोटोमध्ये मिनाब हल्ल्यात ठार झालेल्या 168 शाळकरी मुलांचे फोटो, रक्ताने माखलेली दप्तरे, बूट आणि रिकाम्या जागांवर ठेवलेली पांढरी फुले दिसत होती.

पाकिस्तानची राजधानी इस्लामाबाद इथे शांतता चर्चेत सहभागी होण्यासाठी इराणने अवलंबलेल्या अनोख्या पद्धतीमुळे जगाला धक्का बसला आहे. अमेरिकेसोबतच्या शांतता चर्चेत सहभागी होण्यासाठी इराणचे शिष्टमंडळ शनिवारी इस्लामाबादमध्ये दाखल झाले. यावेळी त्यांनी इस्रायली आणि अमेरिकन हल्ल्यांमध्ये ठार झालेल्या 168 मुलांचे फोटो, त्यांच्या शाळेच्या बॅगा आणि बूट विमानाच्या आसनांवर ठेवले, ज्यामुळे सर्वत्र संतापाची लाट उसळली आहे. पाकिस्तानची राजधानी इस्लामाबादमध्ये दाखल होण्यापूर्वी इराणचे संसद अध्यक्ष मोहम्मद बागेर गालिबाफ यांनी एक भावनिक आणि प्रतिकात्मक संदेश दिला.

मिनाबमध्ये ठार झालेल्या 168 शाळकरी मुलांचे फोटो, त्यांच्या रक्ताने माखलेली दप्तरे आणि बुटांनी विमानातील जागा सजवल्यानंतर, गालिबाफ यांनी 'एक्स'वरील पोस्टला "या प्रवासातील माझे सोबती" असे कॅप्शन दिले. ही भावनिक पोस्ट 28 फेब्रुवारी रोजी इराणच्या मिनाबमधील शजारेह तयबा प्राथमिक शाळेवर झालेल्या इस्रायली आणि अमेरिकन हल्ल्यांच्या स्मरणार्थ आहे. ज्यात या सर्व शाळकरी मुलांचा दुर्दैवी मृत्यू झाला होता. तेहरानने या हल्ल्यासाठी अमेरिका आणि इस्रायलला जबाबदार धरले आहे, ज्यामध्ये प्रामुख्यानं शाळकरी मुले आणि कर्मचारी यांच्यासह किमान 165-168 लोक ठार झाले आणि 100 हून अधिक जखमी झाले. इराणी शिष्टमंडळाला 'मिनाब 168' असे नाव देण्यात आले आहे. गालिबाफ यांच्या या प्रतिकात्मक कृतीचा उद्देश चर्चेतील इराणची मजबूत भूमिका दर्शवणे आणि शहीद झालेल्या मुलांची स्मृती जिवंत ठेवणे हा आहे. शांतता चर्चेदरम्यान मिनाबच्या निष्पाप शहीदांना विसरले जाणार नाही, असा स्पष्ट संदेश ते देत आहेत.