बीएस एज्युकेशन संस्थेची चौकशी करुन अहवाल सादर करा;अनुसूचित जाती जमाती आयोगाचे आदेश 

 एज्युवार्ता न्यूज नेटवर्क 

नागपूर येथील बीएस एज्युकेशन संस्थेबाबत (BS Education Institute) प्राप्त तक्रारींची महाराष्ट्र अनुसूचित जाती जमाती आयोगाने (Scheduled Castes and Tribes Commission))गंभीर दखल घेतली असून याबाबत आदिवासी संशोधन व प्रशिक्षण संस्थेने सखोल चौकशी करुन वस्तुनिष्ठ तपशीलवार अहवाल आयोगाकडे येत्या १५ दिवसात सादर करावा,असे निर्देश महाराष्ट्र अनुसूचित जाती जमाती आयोगाचे ॲड.धर्मपाल मेश्राम (Adv. Dharmapal Meshram)दिले आहेत. 

 डॉ. बाबासाहेब आंबेडकर प्रशिक्षण व संशोधन संस्था (बार्टी), आदिवासी संशोधन व प्रशिक्षण संस्था (टार्टी) छत्रपती शाहू महाराज संशोधन, प्रशिक्षण व मानव विकास संस्था (सारथी) यांच्याकडे बीएस एज्युकेशन संस्थेबाबत प्राप्त तक्रारींच्या अनुषंगाने आयोजित जनसुनावणीत ॲड.धर्मपाल मेश्राम यांनी हे निर्देश दिले आहेत. यावेळी महाराष्ट्र अनुसूचित जाती जमाती आयोगाचे विधी अधिकारी ॲड.राहूल झांबरे, बार्टीच्या अतिरिक्त जिल्हाधिकारी स्नेहल भोसले, निबंधक इंदिरा अस्वार, आदिवासी संशोधन व प्रशिक्षण संस्थेच्या सहसंचालक चंचल पाटील, सारथीच्या व्यवस्थापकीय संचालकांच्या वतीने कौशल्य विभागाचे वरिष्ठ प्रकल्प संचालक सतीश पाटील आदी उपस्थित होते.यावेळी बैठकीत तक्रारदार व तक्रारदार संस्था यांच्या तक्रारीच्या अनुषंगाने संबंधित विभागाने करण्यात आलेली कार्यवाही बाबत सविस्तर चर्चा करण्यात आली.

ॲड मेश्राम म्हणाले, बीएस एज्युकेशन या बँकिग विषयक प्रशिक्षण देणाऱ्या संस्थेविषयी विविध माध्यमातून तक्रारी प्राप्त झाल्या असून याची आयोगाने गांर्भीर्याने दखल घेतली आहे. यासंबधी तक्रार व तक्रारदार संस्थांनी केलेल्या तक्रारीची आदिवासी संशोधन व प्रशिक्षण संस्थेने मुद्येनिहाय चौकशी करावी, चौकशी करतांना तक्रारदार किंवा तक्रारदार संस्थांनी बीएस एज्युकेशन संस्थेविरुद्ध नमूद केलेले मुद्दे, विविध माध्यमातील वृत्त, संस्थेविरुद्ध मनपा, अग्निशमन विभाग व सहायक संचालक नगररचना अशा विविध विभागाने केलेल्या कारवाया,अटी व शर्तींचा भंग, विद्यार्थ्यांचे शपथपत्र आदी बाबींची सर्वंकष चौकशी करावी,या करिता आवश्यकतेनुसार मुनष्यबळ उपलब्ध करुन घ्यावेत. 

बार्टी संस्थेने तक्रारदार किंवा तक्रारदार संस्थांनी बीएस एज्युकेशन संस्थेबाबत मागितलेली माहिती तात्काळ प्रभावासह उपलब्ध करुन त्याचा अहवाल आयोगाकडे सादर करावा. सारथी संस्थेकडे प्राप्त तक्रारीची मुद्देनिहाय चौकशी करुन सारथी संस्थेच्या प्रमुखाच्या अभिप्रायसह वस्तुनिष्ठ चौकशी अहवाल सादर करावा. चौकशी करतांना संस्थेबाबत करण्यात आलेला सामंजस्य करार, संस्था निवडीकरिता राबविण्यात आलेली निवडप्रक्रिया आदी माहिती विचारात घेण्याचे निर्देश ॲड मेश्राम यांनी दिले.

डॉ. बाबासाहेब आंबेडकर प्रशिक्षण व संशोधन संस्था (बार्टी), आदिवासी संशोधन व प्रशिक्षण संस्था (टार्टी) छत्रपती शाहू महाराज संशोधन, प्रशिक्षण व मानव विकास संस्था (सारथी), महात्मा ज्योतिबा फुले संशोधन व प्रशिक्षण संस्था (महाज्योती) यासंस्थेच्या माध्यमातून विद्यार्थ्यांना नागरी सेवा, राज्य सेवा, अभियांत्रिकी सेवा, बँकींग, मिलीटरी भरती, पोलीस भरती पूर्व प्रशिक्षण देण्याचे काम करण्यात येत आहे, याकरिता शासनाच्यावतीने करोडो रूपयांचा निधी उपलब्ध करुन देण्यात येत असतो. या प्रक्षिणाचा उपयोग त्यांचे स्पर्धा परीक्षांमधील यश व सामाजिक आर्थिक जीवनमान उंचविण्याकरिता झाला पाहिजे, या कामांमध्ये हलगर्जीपणा खपवून घेतला जाणार नाही, असे स्पष्ट निर्देश ॲड मेश्राम यांनी दिले.