विद्यापीठांमुळे रखडले CHB धारकांचे मानधन; आठवड्याभरात मान्यता देण्याची उच्च शिक्षण मंत्र्यांची सक्त ताकीद 

एज्युवार्ता न्यूज नेटवर्क 

राज्याच्या उच्च शिक्षण विभागाने (Department of Higher Education)राज्य भारतील तब्बल 951 महाविद्यालयांना तासिका तत्त्वावरील प्राध्यापकांची (CHB professor)पदे भरण्यास ना हरकत प्रमाणपत्र दिले आहे.मात्र, अद्याप संबंधित महाविद्यालयांच्या प्राध्यापकांना विद्यापीठाकडून मान्यताच मिळालेली नाही. परिणामी महाविद्यालयाकडून सहसंचालक कार्यालयाकडे तासिका तत्वावरील प्राध्यापकांचे मानधन (Remuneration of Professors)अदा करण्यासंदर्भातील प्रस्तावच प्राप्त झालेले नाहीत.त्यामुळे येत्या आठवड्याभरात सर्व विद्यापीठांनी कॅम्प लावून प्राध्यापकांच्या मान्यतेची प्रक्रिया पूर्ण करावी,(Complete the professor approval process)अशी सक्त ताकीद राज्याचे उच्च व तंत्र शिक्षण मंत्री चंद्रकांत पाटील (Minister of Higher and Technical Education Chandrakant Patil)यांनी विद्यापीठांना दिली असल्याचे राज्याचे प्र.उच्च शिक्षण संचालक डॉ.शैलेंद्र देवळाणकर(Director of Higher Education Dr. Shailendra Devlankar)यांनी ' एज्युवार्ता' शी बोलताना सांगितले.

राज्यातील CHB धारकांचे वेतन रखडले असल्याचे वृत्त काही प्रसार माध्यमांमध्ये प्रसिद्ध झाले. त्यावर वस्तुस्थिती जाणून घेण्यासाठी राज्याच्या उच्च शिक्षण संचालक कार्यालयाने सर्व सहसंचालक कार्यालयाकडून या संदर्भातील अहवाल मागवला. त्यात राज्यातील बहुतांश सर्व सहसंचालक कार्यालयांतर्गत येणाऱ्या महाविद्यालयांच्या प्राध्यापकांना विद्यापीठाकडून मान्यताच मिळाली नसल्याचे समोर आले. विद्यापीठाकडून मान्यताच मिळाली नाही तर महाविद्यालयांना मानधानाचे प्रस्ताव सादर करता येणार तरी कसे आणि त्यामुळे सहसंचालक कार्यालयाला मानधनही अदा करता येत नाही.त्यामुळे सर्व विद्यापीठांनी कॅम्प लावून सीएचबी धारकांच्या मान्यतेची प्रक्रिया पूर्ण करावी,असे निदेश विद्यापीठांना देण्यात आले आहेत,असेही डॉ. देवळाणकर यांनी सांगितले.

मुंबई विभागातील 57 महाविद्यालयांना सीएचबी तत्त्वावरील पदे भरण्यास ना हरकत प्रमाणपत्र देण्यात आले आहे. परंतु,2025-26 या शैक्षणिक वर्षातील तासिका तत्त्वावरील अध्यापकांच्या मानधना संदर्भातील एकही प्रस्ताव मुंबई सहसंचालक कार्यालयाकडे अद्याप प्राप्त झालेला नाही. पनवेल विभागातील 73 महाविद्यालयांची हीच परिस्थिती आहे.परंतु, सहसंचालक कार्यालयाकडून मानधन रखवडले जात असल्याचा आरोप केला जात आहे. 

पुणे विभागातील 132 महाविद्यालयांना सीएसबी तत्त्वावरील पदे भरण्यास ना हरकत प्रमाणपत्र देण्यात आले असून अद्याप एकही महाविद्यालयाने देयके अदा करण्यासंदर्भातील प्रस्ताव सादर केलेला नाही. परंतु, येत्या 2 सप्टेंबर रोजी यासाठी शिबिर आयोजित करण्यात आले आहे. तर कोल्हापूर विभागातील 121 महाविद्यालयांपैकी केवळ 24 महाविद्यालयांना शिवाजी विद्यापीठाकडून प्राध्यापकांची मान्यता प्राप्त झाली आहे. या प्राध्यापकांच्या वेतन देयकासंदर्भातील कार्यवाही 2 दिवसात केली जाणार आहे. सोलापूर विभागातील 32 महाविद्यालयांना सीएसबी पदे भरण्यास ना हरकत प्रमाणपत्र दिले गेले असून केवळ 7 महाविद्यालयांनी मानधन देयके सादर केले आहेत. 

छत्रपती संभाजी नगर विभागातील 105 महाविद्यालयांना तासिका तत्वावरील पदे भरण्यास ना हरकत प्रमाणपत्र देण्यात आले आहेत. त्यापैकी 10 महाविद्यालयांचे मानधन देयकाचे प्रस्ताव सहसंचालक कार्यालयास प्राप्त झाले आहेत. संबंधित महाविद्यालयातील प्राध्यापकांचे देयके आदा करण्यासंदर्भात कोषागार व बँकेच्या माध्यमातून आवश्यक कार्यवाही सुरू आहे. उर्वरित 95 महाविद्यालयांच्या प्राध्यापकांच्या मान्यतेचे प्रस्ताव 2 दिवसात निकाली काढण्यासंदर्भात संबंधितांना सूचित करण्यात आले आहे. जळगाव विभागातील ६४ महाविद्यालयांना सीएचबी पदे भरण्यास ना हरकत प्रमाणपत्र देण्यात आले असून त्यापैकी विद्यापीठाने मान्यता दिलेल्या अकरा महाविद्यालयांची देयके सहसंचालक कार्यालयाकडे प्राप्त झाले आहेत. उर्वरित महाविद्यालयांची देयके अद्याप सहसंचालक कार्यालयाकडे प्राप्त झाली नाहीत. प्रस्ताव प्राप्त न झाल्यामुळे मानधन वेळेत वितरित होत नाही. 

नांदेड विभागातील 97 महाविद्यालयांना सीएचबी पदे भरण्यास ना हरकत प्रमाणपत्र दिले गेले असून केवळ 15 महाविद्यालयांचे देखाचे प्रस्ताव सहसंचालक कार्यालयास प्राप्त झाले आहेत. त्यातील 11 महाविद्यालयांना रक्कम अदा करण्यात आली आहे.4 महाविद्यालयांचे प्रस्ताव उशिरा प्राप्त झाले आहेत. उर्वरित महाविद्यालयांच्या प्राध्यापकांना अद्याप विद्यापीठाकडून मान्यता प्राप्त न झाल्यामुळे या संदर्भातील प्रस्ताव महाविद्यालयाकडून सहसंचालक कार्यालयाकडे आलेले नाहीत. 

अमरावती विभागातील 100 महाविद्यालयांना सीएचबी पदे भरण्यास ना हरकत प्रमाणपत्र देण्यात आले. केवळ 5 महाविद्यालयांमधील सीएसबी धारक अध्यापकांचे मानधन अदा करण्यात आले आहे. उर्वरित सर्व महाविद्यालयांच्या प्राध्यापकांना विद्यापीठाने अद्याप मान्यता न दिल्यामुळे मानधन अदाकरणासंदर्भातील प्रस्ताव आलेले नाहीत. नागपूर विभागातील 164 महाविद्यालयांना सीएसबी पदे भरण्यास ना हरकत प्रमाणपत्र देण्यात आले आहे. मात्र,एकाही महाविद्यालयाच्या प्राध्यापकाला विद्यापीठाकडून मान्यता मिळालेली नाही. त्यामुळे सहसंचालक कार्यालयाकडे मानधन देयका संदर्भातील प्रस्तावच आलेले नाहीत, अशी माहिती डॉ. देवळाणकर यांनी सांगितली.