दहावीत १०० टक्के मिळूनही नैराश्यात, शेवटी 'साॅरी पप्पा' म्हणत विद्यार्थीनीची आत्महत्या 

एज्युवार्ता न्यूज नेटवर्क

दहावीमध्ये १०० टक्के मार्क मिळून देखील मागील काही महिन्यापासून नैराश्यमध्ये असलेल्या एका विद्यार्थ्याने गळफास घेऊन आत्महत्या (Student committed suicide by hanging himself) केली आहे. तिने लिहिलेल्या चिठ्ठीमध्ये  'साॅरी पप्पा' असा उल्लेख करण्यात आला आहे. सदरील विद्यार्थीनी लातूर येथील राजर्षि शाहू महाविद्यालयात (Rajarshi Shahu College Latur) इयत्ता ११ वी विज्ञान शाखेत शिक्षण घेत असून तिने राहत असलेल्या हाॅस्टेलमध्येच गळफास घेऊन आपली जीवनयात्रा संपवली. 

गळफास घेतलेल्या विद्यार्थीनेचे नाव आदिती आंगद यादव (वय वर्षे १७) असून ती मूळची विजारी ता. वाशी जि. धाराशिव येथील रहिवाशी आहे. दहावीनंतरचे उच्च माध्यमिक शिक्षण घेण्यासाठी तिने काही महिन्यांपूर्वीच लातूरच्या प्रसिद्ध राजर्षि शाहू महाविद्यालयात प्रवेश घेतला होता. आदिती ही तिच्या दोन मैत्रिणीसोबत कॉलेज सुटल्यानंतर  हॉस्टेलला आली. काही वेळाने तिच्या मैत्रिणी अभ्यास करण्यासाठी स्टडी रुमकडे गेल्या. मात्र, आदिती ही एकटीच रुममध्ये होती. काही तासाने तिच्या मैत्रिणी अभ्यास करून जेव्हा रुमकडे परतल्या असता त्यांना आदितीने गळफास घेतल्याचे दिसून आले.

आदितीचे माध्यमिक शिक्षण हे धाराशिव येथे झाले होते. लहानपणापासूनच ती अभ्यासामध्ये हुशार होती. इयत्ता १० वी मध्ये तर तिला १०० टक्के गुण मिळाले होते. त्यामुळेच लातूर येथील राजर्षी शाहू महाविद्यालयात तिला प्रवेश मिळाला होता, या घटनेने तिच्या परिसरात हळहळ व्यक्त केली जात आहे. 

महाविद्यालयातील प्राध्यापकांनी घटनेची माहिती नजीकच्या पोलीस ठाण्यात देताच पोलीसांचे पथक घटनास्थळी दाखल झाले. पंचनामा करीत असताना पोलिसांना एक चिठ्ठी आढळून आली. त्यामध्ये केवळ 'सॉरी पप्पा आणि आदिती' एवढाच उल्लेख होता. आदितीचे वडील हे शेतकरी असून त्यांना दीड एकर शेती आहे. घरची आर्थिक परिस्थिती हलाकीची असल्यानेच तिने हे टोकाचे पाऊल उचलले असल्याचे वडील आंगद यादव यांनी जबाबामध्ये सांगितले. आत्महत्येचे कारण अद्याप समोर आले नसून पुढील तपास पोलीस करत आहेत.