दुष्काळग्रस्त विद्यार्थ्यांच्या मदतीसाठी विद्यापीठनिहाय संपर्क अधिकारी नियुक्ती; संपर्क क्रमांक जाहीर
उच्च व तंत्रशिक्षणमंत्री चंद्रकांत पाटील यांनी दुष्काळग्रस्त २६५ तालुक्यांतील महाविद्यालयांमधील पात्र विद्यार्थ्यांसाठी परीक्षा शुल्क न आकारण्याचे आदेश दिले आहेत. व्यावसायिक अभ्यासक्रमांच्या महाविद्यालयांनाही हा निर्णय लागू आहे.
Eduvarta
एज्युवार्ता न्यूज नेटवर्क
दुष्काळामुळे प्रभावित झालेल्या विद्यार्थ्यांना आर्थिक दिलासा देण्यासाठी महाराष्ट्र सरकारने महत्त्वपूर्ण पावले उचलली आहेत. उच्च व तंत्रशिक्षण विभागाने आयोजित पत्रकार परिषदेत उच्च शिक्षण संचालक डॉ. शैलेंद्र देवळाणकर आणि तंत्रशिक्षण संचालक डॉ. प्रमोद नाईक यांनी स्पष्ट केले की, दुष्काळग्रस्त भागातील पात्र विद्यार्थ्यांकडून परीक्षा शुल्क आकारले जाणार नाही. राजर्षी छत्रपती शाहू महाराज शिक्षण शुल्क शिष्यवृत्ती योजना आणि दुष्काळनिमित्त लागू केलेली शुल्कमाफी यात फरक असल्याचे त्यांनी सांगितले. दुष्काळी परिस्थिती लक्षात घेता विद्यापीठे व महाविद्यालयांनी परीक्षा शुल्क विद्यार्थ्यांकडून घ्यायचेच नसल्याचे डॉ. देवळाणकर यांनी ठामपणे सांगितले.
उच्च व तंत्रशिक्षणमंत्री चंद्रकांत पाटील यांनी दुष्काळग्रस्त २६५ तालुक्यांतील महाविद्यालयांमधील पात्र विद्यार्थ्यांसाठी परीक्षा शुल्क न आकारण्याचे आदेश दिले आहेत. व्यावसायिक अभ्यासक्रमांच्या महाविद्यालयांनाही हा निर्णय लागू आहे. तंत्रशिक्षण संचालक डॉ. प्रमोद नाईक यांनी इशारा दिला की, व्यावसायिक महाविद्यालयांनी फी रेग्युलेटरी अथॉरिटीने मंजूर केलेल्या शिक्षण शुल्काव्यतिरिक्त एक रुपयाही अतिरिक्त आकारल्यास संबंधित संस्थांवर नियमानुसार कारवाई केली जाईल. विद्यार्थी महाविद्यालयाचे नाव नमूद करून थेट डीटीईकडे तक्रार नोंदवू शकतात.
विद्यार्थ्यांच्या तक्रारींचे जलद निराकरण करण्यासाठी प्रत्येक विद्यापीठ स्तरावर कृती समित्या स्थापन करण्यात आल्या आहेत. या समित्यांच्या कामकाजाचा आढावा उच्च शिक्षण संचालनालयाकडून दर पंधरा दिवसांनी घेतला जाणार आहे. शैक्षणिक अडचणी, परीक्षा शुल्कमाफी आणि इतर मदतीसाठी विद्यापीठनिहाय संपर्क अधिकारी नियुक्त करण्यात आले आहेत. मुंबई विद्यापीठासाठी डॉ. पूजा रौंदळे (९३२२०२०५८९) आणि लीलाधर बनसोड (९८३३९६९९७७), सावित्रीबाई फुले पुणे विद्यापीठासाठी डॉ. राजेंद्र तलवारे (९८९०६४२४३१), डॉ. सविता कुलकर्णी (७७२००३६७७४) आणि अजय ठुबे (७५८८१६९१३४) हे संपर्क अधिकारी आहेत.
शिवाजी विद्यापीठ, कोल्हापूरसाठी डॉ. अजितसिंग एन. जाधव (९५४५५९५९९९) आणि अलोक जत्राटकर (९६९८९२८०८०), पुण्यश्लोक अहिल्यादेवी होळकर सोलापूर विद्यापीठासाठी डॉ. अंधारे (९९७५०५५१५५) व डॉ. कळवाणे (७०२०६३४५०२), एसएनडीटी महिला विद्यापीठ, मुंबईसाठी संजय नरेकर (९९२२४४४४६७) आणि डॉ. अंकुश चव्हाण (९६८९६७२५०९) तर यशवंतराव चव्हाण महाराष्ट्र मुक्त विद्यापीठ, नाशिकसाठी डॉ. भटूप्रसाद पाटील (७७९८९२५४८५) व महेंद्र बनसोडे (९७६६०५९०७६) हे अधिकारी उपलब्ध आहेत. विद्यार्थी या क्रमांकांवर संपर्क साधून मदत घेऊ शकतात.
शुल्कमाफीच्या प्रभावी अंमलबजावणीसाठी उच्च शिक्षण संचालनालयाच्या स्तरावर विशेष कक्ष स्थापन करण्यात आला आहे. मॉडर्न महाविद्यालय, गणेशखिंडचे प्राचार्य डॉ. संजय खरात यांच्या अध्यक्षतेखालील या कक्षात वाडिया महाविद्यालयाच्या प्राचार्य डॉ. वृषाली रणधीर, बाबूरावजी घोलप महाविद्यालयाच्या प्राचार्य डॉ. संगीता जगताप, फर्ग्युसन महाविद्यालयाचे प्राचार्य डॉ. श्याम मुडे, स. प. महाविद्यालयाचे प्राचार्य डॉ. अविनाश मोहरील आणि सिम्बासोसिस महाविद्यालयाचे प्राचार्य डॉ. मनोज देवणे यांचा समावेश आहे. या सर्व उपाययोजनांमुळे दुष्काळग्रस्त विद्यार्थ्यांना शैक्षणिक प्रवाहात अडथळा येणार नाही, अशी अपेक्षा व्यक्त करण्यात येत आहे.
