NEET पेपरफुटी प्रकरणातील 'गॉड' सापडला;पुण्यातून तेजस शाहला CBIकडून अटक
सध्या लातूरमध्ये सीबीआयचे पथक सक्रिय आहे. नव्याने दोन विद्यार्थ्यांची चौकशी सुरू करण्यात आली आहे. आतापर्यंत पाच डॉक्टर्स, चार विद्यार्थी आणि पालकांची चौकशी पूर्ण झाली आहे. संपूर्ण प्रकरणात कनेक्शन तपासण्यासाठी सीबीआय वेगवान कारवाई करत आहे.
eduvarta@gmail.com 
एज्युवार्ता न्यूज नेटवर्क
नीट-यूजी परीक्षेच्या (NEET-UG Exam) पेपर फुटी प्रकरणात (NEET Paper Leak Scandal) केंद्रीय अन्वेषण ब्यूरो (सीबीआय) ने पुण्यातून दोन महत्त्वाच्या व्यक्तींना अटक केली आहे. तेजस शाह (NEET Paper Leak Scandal) फिजिक्सचा शिक्षक आणि दुसरा डॉ. मनोज शिरूरे अशी दोघांची नावे समोर आली आहेत. या अटकेमुळे प्रकरणातील मोठे धागेदोरे उघड होण्याची शक्यता वर्तवली जात आहे. सीबीआयच्या माहितीनुसार, तेजस शाह याने मनिषा हवालदार यांच्याकडून थेट पेपर प्राप्त केल्याचे प्राथमिक तपासात समोर आले आहे. त्याच्या मोबाईलमध्ये ‘गॉड’ नावाने एक नंबर सेव्ह (Save number in mobile) केलेला आढळला आहे, जो मनिषा हवालदारशी संबंधित असल्याचे मानले जात आहे. त्यामुळे नीट पेपरफुटीतील गॉड सापडला अशी म्हणायची वेळ आली आहे.
दरम्यान, तेजस शाह हा टेलिग्राम ग्रुपमध्ये सक्रिय होता का, पेपर फुटीनंतर त्याने आर्थिक फायदा कमावला का, यासह त्याचे बँक खात्यांचाही सीबीआय सखोल तपास करणार आहे. त्याला पेपर मिळाल्यानंतर त्याने इतरांना विक्री केली का, याचीही चौकशी होणार आहे. दुसऱ्या अटकलेल्या डॉ. मनोज शिरूरे यांचा शिवराज मोटेगावकर यांच्याशी थेट संबंध असल्याचे तपासात उघड झाले आहे. शिवराज मोटेगावकर यांनी सीबीआयसमोर दिलेल्या कबुलीमध्ये आपल्या मुलाला डॉक्टर बनवण्यासाठी परीक्षेच्या अगोदरच पेपर विकत घेतल्याचे स्पष्ट केले आहे. मोटेगावकर यांना 10 दिवसांची पोलिस कोठडी मिळाली होती. या कालावधीत झालेल्या कसून चौकशीत त्याने ही महत्वाची कबुली दिली. सीबीआयने अद्याप ही माहिती अधिकृतरित्या जाहीर केलेली नाही, मात्र खात्रीलायक सुत्रांकडून ही माहिती समोर आली आहे.
सध्या लातूरमध्ये सीबीआयचे पथक सक्रिय आहे. नव्याने दोन विद्यार्थ्यांची चौकशी सुरू करण्यात आली आहे. आतापर्यंत पाच डॉक्टर्स, चार विद्यार्थी आणि पालकांची चौकशी पूर्ण झाली आहे. संपूर्ण प्रकरणात कनेक्शन तपासण्यासाठी सीबीआय वेगवान कारवाई करत आहे. या प्रकरणात पेपर फुटीचा रॅकेट मोठ्या प्रमाणात कार्यरत असल्याचे चित्र स्पष्ट होत आहे. विद्यार्थी, पालक, डॉक्टर्स आणि मध्यस्थ यांचा समावेश असलेल्या या साखळीतील प्रत्येक कडी उघड करण्यासाठी सीबीआय प्रयत्नशील आहे. तेजस शाह आणि डॉ. मनोज शिरूरे यांच्या चौकशीतून अजून किती नावे समोर येतात, याकडे सर्वांचे लक्ष लागले आहे.
