परदेशी शिक्षणाची यादी खोळंबली, विद्यार्थ्यांना विलंबामुळे फटका.. 

एज्युवार्ता न्यूज नेटवर्क

'बार्टी', 'सारथी', 'टीआरटीआय' आणि 'महाज्योती' (BARTI, SARTHI,TRTI, MAHAJYOTI)आदी विविध संस्थांकडून मराठा, एससी, एसटी आणि ओबीसी प्रवर्गातील आर्थिकदृष्ट्या गरीब कुटुंबातील गुणवंत विद्यार्थ्यांना परदेशी शिक्षणासाठी शिष्यवृत्ती (Foreign scholarship to quality students) दिली जाते. परदेशातील नामांकित टॉप २०० शिक्षण संस्थांमध्ये प्रवेश घेणार्‍या विद्यार्थ्यांना ही शिष्यवृत्ती मिळते. त्यामध्ये सारथी संस्थेकडून (Chartered organization) दरवर्षी ७५ विद्यार्थ्यांना ही शिष्यवृत्ती दिली जाते. मात्र, यंदा परदेशी शिक्षणाची यादी खोळंबल्याने विद्यार्थ्यांना या विलंबामुळे फटका बसण्याची शक्यता वर्तवण्यात येत आहे.  

मराठा आणि कुणबी समाजातील विद्यार्थ्यांना सारथी संस्थेतर्फे परदेशी शिक्षणासाठी शिष्यवृत्ती दिली जाते. मात्र, यंदा शैक्षणिक वर्ष निम्मे संपले आले असताना परदेशी शिष्यवृत्तीसाठी पात्र विद्यार्थ्यांची यादी अद्यापही जाहीर करण्यात आलेली नाही. परदेशातील महाविद्यालये सुरू झाली असून, 'सारथी'कडून शिष्यवृत्ती मिळण्याच्या आशेवर असलेल्या विद्यार्थ्यांच्या अडचणींत भर पडली आहे. त्यामुळे 'सारथी'कडून यादी कधी जाहीर केली जाणार, असा प्रश्न विद्यार्थ्यांना पडला आहे.

यंदा मराठा आणि कुणबी समाजातील १४२ विद्यार्थ्यांनी 'सारथी'कडे या शिष्यवृत्तीसाठी अर्ज आले आहे. यातील ७५ गुणवत्ताधारक विद्यार्थ्यांची निवड 'सारथी'कडून केली जाणार आहे. मात्र, 'सारथी'कडून विद्यार्थ्यांची यादी अंतिम करून राज्य सरकारकडे मंजुरीला पाठविण्यास विलंब झाला आहे. त्यामुळे ही प्रवेश यादी प्रसिद्ध करण्यास कालावधी लागत असल्याचे सांगण्यात आले आहे.