पवित्र पोर्टलवर शिक्षकांच्या रिक्त पदांची माहिती भरा, शिक्षण विभागाच्या खाजगी संस्थाना सूचना
राज्याच्या शालेय शिक्षण विभागातर्फे शिक्षक भरतीच्या दुसऱ्या टप्प्याच्या प्रक्रियेला सुरुवात करण्यात आली. त्या अनुषंगाने पवित्र पोर्टलमार्फत शिक्षक पदभरती करिता खाजगी शैक्षणिक संस्थांच्या रिक्त पदांची माहिती भरण्याच्या सूचना, पुणे जिल्हा परिषदेचे (माध्यमिक) शिक्षणाधिकारी डाॅ. भाऊसाहेब कारेकर यांनी दिल्या आहेत.
eduvarta@gmail.com 
एज्युवार्ता न्यूज नेटवर्क
राज्याच्या शालेय शिक्षण विभागातर्फे (Department of School Education) शिक्षक भरतीच्या दुसऱ्या टप्प्याच्या प्रक्रियेला सुरुवात करण्यात आली. त्या अनुषंगाने पवित्र पोर्टलमार्फत (Pavitra Portal) शिक्षक पदभरती (Teacher Recruitment) करिता खाजगी शैक्षणिक संस्थांच्या रिक्त पदांची माहिती भरण्याच्या सूचना, पुणे जिल्हा परिषदेचे (माध्यमिक) शिक्षणाधिकारी डाॅ. भाऊसाहेब कारेकर (Dr. Bhausaheb Karekar) यांनी दिल्या आहेत. खाजगी शाळांना पदभरती करिता tait2022.mahateacherrecruitment.org.in या संकेतस्थळावर जाहिरात देता येणार आहे. यापूर्वी देखील शिक्षण विभागाने वेळोवेळी खाजगी व्यवस्थापनाच्या शाळांना सूचना दिला दिल्या आहेत.
बहतांश संस्थांनी अद्यापही बिंदू नामावली तपासून घेतलेली नाही. तपासून घेतलेल्या संस्थांपैकी काही संस्थांनी अद्यापही पवित्र पोर्टलवर जाहिरातीसंदर्भात कार्यबाही केलेली नाही असे निदर्शनास आले आहे. शिक्षक भरती न केल्यास विद्यार्थ्यांचे शैक्षणिक नुकसान होणार आहे. वेळोवेळी संधी देऊनही शिक्षक भरतीबाबतची कार्यवाही केलेली नसल्याने भविष्यात शिक्षक उपलब्ध न झाल्यास यास सर्वस्वी संस्था जबाबदार राहील याची नोंद घ्यावी, अशा कडक सूचना देण्यात आल्या आहेत.
पवित्र पोर्टलवर नोंद केलेल्या उमेदवारांमधून पात्र उमेदवारांच्या नियुक्तीच्या शिफारशीसाठी संबंधित -व्यवस्थापनाकडून पोर्टलवर आरक्षणनिहाय व विषयनिहाय रिक्त पदांसाठी माध्यमनिहाय जाहिरात देणे आवश्यक आहे. व्यवस्थापनास जाहिरात देण्यापूर्वी त्यांच्या व्यवस्थापनाची बिंदूनामावलीची तपासणी संस्थेच्या मुख्यालयाशी संबंधित विभागाच्या सहायक आयुक्त, (मावक), मा. विभागीय आयुक्त कार्यालय यांचेकडून अद्ययावत प्रमाणित केलेली असणे आवश्यक आहे.
यापूर्वी प्रमाणित केलेल्या बिंदूनामावालीनंतर SEBC चे आरक्षण, पेसा क्षेत्रातील आरक्षण यामध्ये बदल झाल्यामुळे प्रत्येक व्यवस्थापनास बिंदूनामावली अद्ययावत करून प्रमाणित केलेली असणे आवश्यक आहे. व्यवस्थापनाकडे एकापेक्षा जास्त माध्यमांच्या शाळा असल्यास बिंदूनामावलीची माहिती माध्यमनिहाय नोंद करावी. जाहिरातीसाठी बिंदूनामावलीची माहिती भरल्यानंतर ती तपासून मान्य केल्यानंतरच विषयाचा गट व विषयाची माहिती नोंद करता येते व त्यानंतर विषयाची माहिती तपासून मान्य केल्यानंतरच जाहिरात तयार करता येईल. त्यानुसार आपण जाहिरात प्रसिध्द करण्याची प्रक्रिया २८ फेब्रुवारी २०२५ पूर्वी करावी अशा सूचना देण्यात आल्या आहेत.
