धर्मेंद्र प्रधान यांच्याविरोधात शैक्षणिक लढा, कोकरोच जनता पार्टीचे दिल्लीत ६ जून रोजी आंदोलन 

एज्युवार्ता न्यूज नेटवर्क 

केंद्रीय शिक्षणमंत्री धर्मेंद्र प्रधान (Dharmendra Pradhan) यांच्या राजीनाम्याची मागणी (Demand for resignation) करत कोकरोच जनता पार्टीचे (CJP) संस्थापक अभिजीत दीपके येत्या ६ जून रोजी दिल्लीतील जंतर-मंतर येथे शांततापूर्ण आंदोलन करणार आहेत. ही मागणी केवळ NEET-UG २०२६ पेपरफुटीपुरती मर्यादित नाही, तर CBSE बोर्ड, CUET आणि SSC सारख्या महत्त्वाच्या परीक्षांमधील वारंवार येणाऱ्या अनियमितता आणि तांत्रिक गडबडींमुळे निर्माण झालेल्या शैक्षणिक संकटाकडे लक्ष वेधणारी आहे.

NEET-UG २०२६ मध्ये प्रश्नपत्रिका गळतीच्या आरोपांमुळे परीक्षा रद्द करावी लागली. सुमारे २३ लाख विद्यार्थ्यांच्या एक वर्षाच्या तयारीवर पाणी पडले. पुन्हा परीक्षा २१ जूनला होणार असली तरी विद्यार्थ्यांमध्ये तणाव आणि अनिश्चितता कायम आहे. CBSE बोर्ड परीक्षा मध्ये डिजिटल मूल्यमापन प्रणालीमुळे उत्तरपत्रिका स्कॅनिंग, पृष्ठे गायब होणे आणि गुणांमध्ये तफावत यासारख्या समस्या उद्भवल्या. काही सेट्समध्ये प्रश्नपत्रिका कठीण असल्याच्या तक्रारी आल्या, ज्यामुळे न्याय्य मूल्यमापनावर प्रश्नचिन्ह निर्माण झाले.

CUET-UG २०२६ मध्ये टेक्निकल ग्लिचमुळे अनेक केंद्रांवर परीक्षा उशिरा सुरू झाली. विद्यार्थ्यांना तासन्तास प्रतीक्षा करावी लागली. एनटीएने भरपाई वेळ दिली तरी लाखो विद्यार्थ्यांच्या नियोजनावर परिणाम झाला. एकूणच, या सर्व परीक्षांमुळे शालेय शिक्षण ते उच्च शिक्षणापर्यंतची संपूर्ण प्रक्रिया प्रभावित झाली आहे. अभिजीत दीपके यांच्या कोकरोच जनता पार्टीने आठ लाखांहून अधिक स्वाक्षऱ्या गोळा केल्या असून, विद्यार्थ्यांच्या भविष्यासाठी शिक्षणमंत्र्यांनी वरील सर्व प्रकरणांची नैतिक जबाबदारी स्विकारून राजीनामा देण्याची मागणी केली आहे. ही समस्या केवळ एका परीक्षेची नाही, तर संपूर्ण शैक्षणिक विश्वासार्हतेची आहे. लाखो विद्यार्थ्यांच्या मेहनत, कुटुंबांच्या आर्थिक आणि भावनिक गुंतवणुकीचे रक्षण करण्यासाठी तातडीने सुधारणांची गरज आहे.

अभिजीत दीपके याचा शैक्षणिक प्रवास प्रेरणादायी आहे. पुण्यात पत्रकारितेचे शिक्षण पूर्ण केल्यानंतर त्यांने अमेरिकेतील बोस्टन युनिव्हर्सिटीमध्ये पब्लिक रिलेशन मधील दोन वर्षांचा मास्टर्स पदवीधरचे शिक्षण घेतले. सोशल मीडिया आणि संवाद क्षेत्रातील त्याचे कौशल्य आता विद्यार्थ्यांच्या आवाजाला बळकटी देणारे ठरत आहे. बोस्टनहून भारतात परत येऊन परीक्षा प्रणालीतील पारदर्शकता आणि जबाबदारीसाठी लढा देण्याच्या तयारीने ६ जून रोजी दिल्लीत धर्मेंद्र प्रधान यांच्या राजीनाम्याची मागणी घेऊन पुढे येत आहे.

देशातील चार प्रमुख परीक्षा—नीट यूजी, सीबीएसई १२वी बोर्ड परीक्षा, एसएससी जीडी परीक्षा आणि सीयूईटी यूजी—विविध कारणांमुळे वादात सापडल्या आहेत. पेपरफुटीचे आरोप, मूल्यांकन प्रक्रियेबद्दलचे प्रश्न, आणि परीक्षा केंद्रांवरील तांत्रिक अडचणी व गोंधळामुळे लाखो विद्यार्थी आणि पालकांमध्ये चिंता वाढली आहे. या चालू असलेल्या घटनांमुळे परीक्षा प्रणालीची पारदर्शकता, तयारी आणि व्यवस्थापन यावर एक नवीन चर्चा सुरू झाली आहे.