बीएससी नर्सिंग: प्रवेश नोंदणीसाठी 28 सप्टेंबरपर्यंत मुदतवाढ

एज्युवार्ता न्यूज नेटवर्क 

राज्य सामायिक प्रवेश परीक्षा कक्षातर्फे (State Common Entrance Test) राबवल्या जाणाऱ्या बीएससी नर्सिंग अभ्यासक्रमाच्या (BSc Nursing Courses) चौथ्या फेरीचे वेळापत्रक प्रसिद्ध (Fourth round schedule released) करण्यात आले आहे. त्यानुसार विद्यार्थ्यां 23 ते २८ सप्टेंबर या कालावधीत नव्याने प्रवेश नोंदणी करता येणार आहे. चौथी फेरी संपण्यासाठी जवळपास दीड महिन्याचा कालावधी लागणार आहे. त्यामुळे संपूर्ण प्रवेश प्रक्रिया लांबणीवर (Admission process delayed) पडण्याची शक्यता वर्तवण्यात येत आहे. सीईटी सेलकडून देण्यात आलेल्या माहितीनुसार, विद्यार्थ्यांना प्रवेश नोंदणीसाठी २८ सप्टेंबरपर्यंत मुदतवाढ देण्यात आली आहे. त्यामुळे अद्याप प्रवेशासाठी नोंदणी न केलेल्या विद्यार्थ्यांनी आणखी एक संधी उपलब्ध झाली आहे. तर यापूर्वी पार पडलेल्या तीन फेऱ्यांमध्ये प्रवेश निश्चित झालेल्या ९ हजार २५ विद्यार्थ्यांना जवळपास दीड महिना ताटकळत बसावे लागणार आहे.

आयुर्वेदाची नाळ जोडणारा उपक्रम; “आयुर्वेद फॉर किड्स” पुस्तकाचे प्रकाशन
 
बीएससी नर्सिंग अभ्यासक्रमासाठी सीईटी सेलकडून ७ आणि ८ एप्रिल रोजी प्रवेश परीक्षा घेण्यात आली. यंदा बीएससी नर्सिंग अभ्यासक्रमासाठी १५ हजार ७६० जागा उपलब्ध आहेत. या जागांवर प्रवेश मिळवण्यासाठी राज्यभरातून ४७ हजार ५०१ विद्यार्थ्यांनी नोंदणी केली होती. त्यापैकी ४३ हजार १९१ विद्यार्थ्यांनी प्रत्यक्ष परीक्षा दिली होती. त्यापैकी फक्त १४ हजार १६७ विद्यार्थ्यांनी प्रवेश प्रक्रियेसाठी अर्ज दाखल केले.

तिसऱ्या फेरीपर्यंत राज्यातील १५ हजार ७६० जागांपैकी ९ हजार २५ जागांवर विद्यार्थ्यांनी प्रवेश निश्चित केले आहेत. सीईटी कक्षाने ही प्रवेश प्रक्रिया २५ जुलै रोजी सुरू केली. या अभ्यासक्रमाची तिसरी फेरी १५ सप्टेंबरला पूर्ण झाली. त्यानंतर ही प्रवेश प्रक्रिया पुन्हा थांबवली. तिसऱ्या फेरीपर्यंत अर्ज दाखल केलेल्या १४ हजार १६७ विद्यार्थ्यापैकी ९ हजार २५ विद्यार्थ्यांनी प्रवेश निश्चित केले आहेत. आता चौथ्या फेरीसाठी ६ हजार ७३५ जागा उपलब्ध असून ५ हजार १४२ विद्यार्थ्यांचे प्रवेश होणे बाकी आहेत. अर्ज दाखल केलेल्या विद्यार्थ्यापैकी ५ हजार १४२ विद्यार्थी अद्यापही प्रवेशाच्या प्रतीक्षेत आहेत.