डेटा ॲनालिटीक्स आणि बिझिनेस इंटेलिजन्स सर्टीफिकेशन कोर्स सुरू

एज्युवार्ता न्यूज नेटवर्क 

सावित्रीबाई फुले पुणे विद्यापीठातील तंत्रज्ञान विभागातर्फे (Department of Technology Savitribai Phule Pune University) पारंपारिक पदवी अभ्यासक्रमासोबतच स्कील कोर्सेसच्या माध्यमातून रोजगारांच्या संधीची उपलब्धता करून देण्यासाठी विद्यापीठात ‘डेटा ॲनालिटीक्स आणि बिझिनेस इंटेलिजन्स’ (Data Analytics and Business Intelligence) या सर्टीफिकेशन कोर्स सुरू केला जाणार आहे.

डेटा ॲनालिटीक्स आणि बिझिनेस इंटेलिजन्स या विषयाशी निगडीत अनेक रोजगाराच्या संधी उपलब्ध आहेत.हीच बाब लक्षात घेऊन बऱ्याच इन्स्टीट्यूटतर्फे असे कोर्सेस महागड्या स्वरूपात उपलब्ध करून दिले जात आहेत. परंतु, विद्यापीठामध्ये हाच सर्टीफिकेशन कोर्स कमी शुल्कात उपलब्ध करून दिला जाणार आहे. वेगवेगळ्या ॲनॅलिटीकल टूल्सच्या माध्यमातून डेटा इंटरप्रिटेशन करून देणारा हा कोर्स ‘डेटा ड्रीव्हन’ असलेल्या सगळ्याच उद्योगांसाठी महत्वपूर्ण भूमिका बजावणार आहे. सध्याच्या पेपरलेस इंडस्ट्रीसाठी असे स्कीलसेट शिकून विद्यार्थी रोजगारक्षम होऊ शकतात, अशी माहिती सावित्रीबाई फुले पुणे विद्यापीठातील तंत्रज्ञान विभागाचे प्रमुख डॉ.आदित्य अभ्यंकर यांनी दिली.

विद्यापीठातील तंत्रज्ञान विभागात हा कोर्स येत्या १ ॲाक्टोबरपासून सुरू होत असून, प्रवेश क्षमता मर्यादीत असणार आहे. या अभ्यासक्रमाची प्रवेश प्रक्रिया सावित्रीबाई फुले पुणे विद्यापीठाच्या तंत्रज्ञान विभागात सुरू झाली आहे. विद्यार्थ्यांनी कोर्सच्या अधिक माहितीसाठी तंत्रज्ञान विभागास भेट द्यावी, असे आवाहन तंत्रज्ञान विभागाचे प्रमुख डॉ.आदित्य अभ्यंकर यांनी केले आहे.