सेमी इंग्रजी माध्यमांच्या शिक्षकांसाठी कौशल्य चाचणी होणार; शिक्षण आयुक्तांचे स्पष्टीकरण
सर्व अभियोग्यता धारकांसाठी नाही तर सेमी इंग्रजी माध्यमांच्या शिक्षकांसाठी कौशल्य चाचणी घेण्यात येणार असल्याची तरतूद करण्यात आली आहे, असे स्पष्टीकरण शिक्षण आयुक्त सूरज मांढरे यांनी दिले आहे.
eduvarta@gmail.com 
एज्युवार्ता न्यूज नेटवर्क
पवित्र पोर्टल संकेतस्थळामार्फत (Pavitra Portal Website) निवड झालेल्या शिक्षकांना पुन्हा एक परीक्षा द्यावी लागणार या चर्चेला पुर्णविराम मिळाला आहे. नव्याने नियुक्ती झालेल्या शिक्षकांना परीक्षा द्यावी लागणार याबाबत शिक्षण आयुक्त सूरज मांढरे (Education Commissioner Suraj Mandhare) स्पष्टोक्ती दिली आहे. सर्व अभियोग्यता धारकांसाठी नाही तर सेमी इंग्रजी माध्यमांच्या शिक्षकांसाठी (Semi English Medium Teacher) कौशल्य चाचणी घेण्यात येणार असल्याची तरतूद करण्यात आली आहे, असे सूरज मांढरे म्हणाले.
राज्यातील स्थानिक स्वराज्य संस्था, खासगी शैक्षणिक व्यवस्थापनांतील २१ हजार ६७८ रिक्त पदांतील एकूण १९ हजार ९८६ पदांसाठी पात्र उमेदवारांची शिफारस करण्यात आली आहे. २०१३ मध्ये निश्चित केलेल्या धोरणास अनुसरून मुख्य कार्यकारी अधिकारी यांच्या मागणीप्रमाणे सेमी इंग्रजी माध्यमाचे शिक्षक उपलब्ध करून देण्याबाबत शासनाचे निर्देश आहेत. अशा शिक्षकांच्या नियुक्तीनंतर शिक्षण सेवक कालावधीमध्ये त्यांची कौशल्य चाचणी राज्य शैक्षणिक संशोधन आणि प्रशिक्षण परिषदेच्या अधीनस्त विद्या प्राधिकरण छत्रपती संभाजीनगर या तज्ज्ञ संस्थेकडून घेण्याचे निर्देश देण्यात आले आहेत.
सामान्य कुटुंबातील विद्यार्थ्यांना जिल्हा परिषदेच्या शाळांमध्येही इंग्रजी माध्यमातून चांगले शिक्षण मिळावे, त्यांच्या पालकांना परवडत नसूनही इंग्रजी माध्यमाच्या शाळांवर अवलंबून राहावे लागू नये. त्या दृष्टीने इंग्रजी विषयाची अधिक जाण असलेले शिक्षक या प्रक्रियेतून मिळण्याच्या हेतूने या कौशल्य चाचणीची तरतूद करण्यात आली आहे. त्यानुसार उमेदवारांनी त्यांचे प्राधान्यक्रम नोंदवले आहेत. सेमी इंग्रजी माध्यमाच्या रिक्त पदांसाठी उमेदवारांचे प्राधान्यक्रम लक्षात घेऊन शिफारस करण्यात आली आहे. पहिल्या टप्प्यात १ हजार २८८ उमेदवारांची सेमी इंग्रजी माध्यमासाठी शिफारस झाली आहे, अशी माहिती मांढरे यांनी दिली.
