KVS चा स्थापना दिवस साजरा; केंद्रीय विद्यालय क्रमांक 2 मध्ये जल्लोष

एज्युवार्ता न्यूज नेटवर्क 

पीएम श्री केंद्रीय विद्यालय क्रमांक 2, एएफएस पुणे येथे (PM Shri Kendriya Vidyalaya No.2 ) केंद्रीय विद्यालय संघटनेचा (KVS) 62 वा स्थापना दिवस उत्साह आणि जल्लोषात साजरा करण्यात आला. या कार्यक्रमाने KVS च्या गौरवशाली वाटचालीची आणि विद्यार्थ्यांच्या सर्वांगीण विकासासाठी घेतलेल्या कटिबद्धतेची झलक दाखवण्यात आली.

कार्यक्रमास प्रमुख पाहूणे म्हणून निवृत्त हवाई दल अधिकारी श्री. अगलावे आणि विशेष पाहुणे म्हणून निवृत्त KVS शिक्षिका सीमा अगलावे उपस्थित होत्या. प्रमुख पाहुण्यांचे स्वागत विद्यालयाचे प्राचार्य भारत भूषण आणि मुख्याध्यापक संजयकुमार पाटील यांनी केले.

कार्यक्रमात  विविध वर्गातील विद्यार्थ्यांनी भारताच्या समृद्ध सांस्कृतिक परंपरेचे दर्शन घडवत अप्रतिम नृत्य सादर केले. तसेच विद्यार्थ्यांनी योगाच्या सुंदर आसनांचे प्रदर्शन केले, ज्यातून आरोग्य व मनःशांतीचे महत्त्व अधोरेखित झाले. KVS च्या परंपरेवर आधारित प्रेरणादायी भाषण आणि विचार करायला लावणारे नाट्य सादर करण्यात आले. एक भारत श्रेष्ठ भारत या विषयावर आधारित प्राथमिक विद्यार्थ्यांनी दिलेले सजीव सादरीकरण विशेष गाजले. या सादरीकरणातून भारताच्या विविधतेतील एकतेचे सुंदर चित्र उभे राहिले.

अगलावे यांनी विद्यार्थ्यांची आणि शिक्षकांची प्रशंसा करताना KVS च्या गुणवत्तापूर्ण शिक्षण आणि सर्वांगीण विकासासाठीच्या भूमिकेची विशेष उल्लेख केला. त्यांनी विद्यार्थ्यांच्या आत्मविश्वासाचे आणि सादरीकरणातील कौशल्याचे कौतुक केले.

कार्यक्रमाची सुरुवात दीप प्रज्वलन आणि विद्यार्थ्यांनी सादर केलेल्या स्वागतगीताने झाली. या विशेष प्रसंगी विद्यार्थ्यांनी विविध सांस्कृतिक कार्यक्रम सादर करून आपली कला आणि सृजनशीलता दाखवली. कार्यक्रमाचा समारोप अर्चना उपाध्याय यांच्या आभार प्रदर्शनाने झाला.