भारतीय रिसर्चर सुचीर बालाजी यांचा संशयास्पद मृत्यू ; ChatGPT वर केले होते गंभीर आरोप

एज्युवार्ता न्यूज नेटवर्क 

ChatGPT डेव्हलप करणारी आर्टिफिशियल इंटेलिजन्स कंपनी OpenAI कडून कॉपीराईटचे उल्लंघन केले जात असल्याचा आरोप करणारे भारतीय रिसर्चर सुचीर बालाजी (Indian researcher Suchir Balaji) यांचा मृतदेह सॅन फ्रान्सिस्को (San Francisco)येथे आढळून आला. सूचीर बालाजी यांचा मृत्यू 26 नोव्हेंबर रोजी झाला असून ही घटना 14 डिसेंबर रोजी उघडकीस आली आहे.त्यामुळे आश्चर्य व्यक्त केले जात आहे.तसेच ही आत्महत्या असावी,असा संशय सॅन फ्रान्सिस्को  पोलिसांकडून व्यक्त केला जात आहे.

सुचीर बालाजी अनेक दिवसांपासून आपल्या घराच्या बाहेर पडले नव्हते. तसेच त्यांनी त्यांच्या सहकाऱ्यांच्या फोन कॉलला उत्तर दिले नव्हते. सूचीरचे मित्र आणि सहकारी त्यांच्या फ्लॅटवर पोहोचले.मात्र, त्यांनी दरवाजा उघडला नाही. त्यांनी दरवाजा आतून बंद केल्याचे आढळून आले. याबाबत पोलिसांना माहिती दिल्यानंतर सॅन फॅन्सिको पोलिसांनी दरवाजा तोडला. त्यानंतर सुचीर बालाजी यांचा मृतदेह आढळून आला. 

प्राथमिक तपासात कोणताही पुरावा आढळून आला नाही. त्यामुळे हे प्रकरण आत्महत्येचे असावे, असा संशय पोलीस व्यक्त करत आहेत. सुचीर बालाजी यांनी ऑगस्ट महिन्यात OpenAI कंपनीचा राजीनामा दिला होता. तसेच कंपनीवर कॉपीराइट्सचे उल्लंघन केल्याबाबत गंभीर आरोप केले होते. त्यांच्या मृत्यूची बातमी समोर आल्यानंतर अनेक मोठ्या व्यक्तींनी आश्चर्य व्यक्त केले असून त्याबाबत सोशल मीडियावर तीव्र प्रतिक्रिया व्यक्त केल्या आहेत.

ChatGTP ला प्रशिक्षित करण्यासाठी योग्य कायदेशीर प्रक्रियेचे पालन केलेले नाही. तसेच  कॉपीराईट केलेली सामग्री वापरल्याचा आरोप सुचीर बालाजी यांना केला होता.ChatGTP सारख्या तंत्रज्ञानामुळे इंटरनेटचे नुकसान होत असल्याची मुलाखत त्यांनी एका वृत्तपात्राला दिली होती. बालाजी यांचा आरोप होता की अनेकांचा डेटा कंपनी त्यांच्यात संमतीशिवाय वापरत आहे. अनेक लेखक, प्रोग्रॅमर आणि पत्रकारांनी ओपन ए आय कंपनी विरुद्ध खटले दाखल केले होते.त्यात सुचीर बालाजी यांनी केलेला आरोप केंद्रस्थानी होता.